चीनका राष्ट्रपति सी चिनफिङले मध्यपूर्वका देशहरूलाई बाह्य हस्तक्षेपको विरोध गर्न आग्रह गरेका छन्। इजिप्ट भ्रमणका क्रममा उनले क्षेत्रीय शान्ति र सुरक्षाका लागि संवादलाई प्राथमिकता दिनुपर्ने बताएका हुन्।
इजिप्टका राष्ट्रपति अब्देल फताह अल-सिसीसँगको भेटमा दुवै नेताले अमेरिका–इरान युद्ध अन्त्य गर्न कूटनीतिक समाधान आवश्यक रहेकोमा जोड दिएका छन्।
भेटका क्रममा चीन र इजिप्टले स्वेज नहर क्षेत्रमा संयुक्त औद्योगिक क्षेत्र विस्तार गर्ने समझदारी गरेका छन्। साथै सूचना प्रविधि, यातायात, उद्योग, आपूर्ति शृंखला र व्यापारमा सहकार्य बढाउने सहमति पनि भएको छ।
चीनले अन्तर्राष्ट्रिय जलमार्गको सुरक्षा सुनिश्चित गर्न र क्षेत्रीय विकासमा सहयोग गर्न तयार रहेको जनाएको छ। विश्लेषकहरूका अनुसार अमेरिका–इरान द्वन्द्वका बीच चीन मध्यपूर्वमा आफ्नो प्रभाव विस्तार गर्न खोजिरहेको छ।
