इरानसँगको युद्ध छ महिनामा प्रवेश गर्दा खाडी क्षेत्रको ऊर्जा उद्योगमा गम्भीर असर परेको छ। युद्ध सुरु भएयता विश्व बजारमा ब्रेन्ट कच्चा तेलको मूल्य करिब २२ प्रतिशतले वृद्धि भएर प्रति ब्यारेल ८८ अमेरिकी डलर पुगेको छ। यसबाट अमेरिकी तेल कम्पनीहरूले उल्लेखनीय आर्थिक लाभ उठाए पनि खाडी क्षेत्रमा रहेका उनीहरूका ऊर्जा परियोजना र पूर्वाधारमाथि जोखिम बढेको छ।
युद्धको प्रत्यक्ष असर फारसको खाडीस्थित रणनीतिक हर्मुज जलडमरूमध्यमा परेको छ। विश्वको करिब पाँचौं हिस्सा तेल तथा प्राकृतिक ग्यास ढुवानी हुने यो समुद्री मार्ग पूर्ण रूपमा सामान्य अवस्थामा फर्किन सकेको छैन। परिणामस्वरूप ऊर्जा आपूर्तिमा अवरोध उत्पन्न भएको छ भने अन्तर्राष्ट्रिय बजारमा तेल तथा ग्यासको मूल्य उच्च बनेको छ।
इरान तथा उसका समर्थित समूहहरूले खाडी क्षेत्रका विभिन्न ऊर्जा पूर्वाधारमा आक्रमण जारी राखेका छन्। संयुक्त अरब इमिरेट्स (यूएई), कुवेत, बहराइन तथा साउदी अरेबियाका तेल र ग्यास प्रशोधन केन्द्र, रिफाइनरी तथा विद्युत् संरचनाहरू आक्रमणको निशानामा परेका छन्। कुवेतको मीना अल-अहमदी र मीना अब्दुल्लाह रिफाइनरी, बहराइन पेट्रोलियम कम्पनीको रिफाइनरी तथा यूएईको अल-रुवाइस औद्योगिक क्षेत्र प्रभावित भएको बताइएको छ।
कतारको रस लाफान औद्योगिक क्षेत्र, जुन विश्वकै सबैभन्दा ठूलो एलएनजी निर्यात केन्द्र मानिन्छ, पनि बारम्बार आक्रमणमा परेको छ। यसका कारण कतिपय चरणमा उत्पादन नै रोक्नुपरेको थियो। ऊर्जा विज्ञहरूका अनुसार क्षतिग्रस्त संरचनाको मर्मतमा अर्बौं डलर खर्च हुने र पूर्ण रूपमा सञ्चालनमा फर्किन तीनदेखि पाँच वर्षसम्म लाग्न सक्ने अनुमान गरिएको छ।
अमेरिकी ऊर्जा कम्पनी एक्सोनमोबिल, कोनोकोफिलिप्स, चेभरोन र अक्सिडेन्टल पेट्रोलियमका परियोजनाहरू पनि प्रभावित भएका छन्। केही कम्पनीले उत्पादन घटाउनुपरेको छ भने कतिपय विस्तार योजनाहरू ढिलाइ हुने सम्भावना बढेको छ। यद्यपि उच्च तेल मूल्यका कारण उनीहरूको आम्दानीमा भने तत्काल कमी आएको छैन।
-अलजजिराबाट
