तितोपाटी-पाल्पाको माथागढी गाउँपालिका–२, रुप्सेस्थित पिपलडाँडा यतिबेला आन्तरिक पर्यटकलाई स्वागत गर्न नयाँ स्वरूपमा तयार भएको छ। प्राकृतिक दृश्यावलोकन, धार्मिक आस्था र आधुनिक पूर्वाधारको अनौठो सङ्गम बनेको यो क्षेत्र अहिले वनभोज (पिक्निक) र वरिपरिका दृश्य अवलोकनका लागि जिल्लाकै आशालाग्दो गन्तव्यका रूपमा चिनिदैछ।
पिपलडाँडाको सबैभन्दा ठूलो विशेषता यहाँबाट देखिने मनोरम दृश्यहरू हुन्। समुद्री सतहबाट उच्च स्थानमा रहेको यस क्षेत्रबाट पाल्पाको ‘अन्न भण्डार’ मानिने माडीफाँट, ऐतिहासिक तानसेन बजार, श्रीनगर डाँडा, बगनास डाँडा, पोखराथोक, आर्यभन्ज्याङ्ग चिदीपानी, कसेनी, मदनपोखरा जस्ता क्षेत्रहरू स्पष्ट रूपमा देखिन्छन्। शीतल हावापानी र आँपका बगैँचाले गर्दा गर्मीयाममा पनि यहाँको वातावरण निकै लोभलाग्दो हुने गर्दछ। प्राकृतिक सुन्दरता मात्र होइन, पिपलडाँडाको आफ्नै धार्मिक महत्त्व पनि छ। यहाँ अवस्थित जल्पादेवी मन्दिरले यस क्षेत्रलाई आध्यात्मिक गरिमा प्रदान गरेको छ। विगतका वर्षहरूमा हरितालिका तीजमा लाग्ने ठुलो मेला, मौलिक तीज गीतका भाका र चर्खे पिङको रौनकले पिपलडाँडाको पहिचानलाई माडीमा स्थापित गरेको थियो।
पछिल्लोपटक आन्तरिक बसाइँसराइका कारण केही समय सुनसान बनेको पिपलडाँडालाई वडा कार्यालय र स्थानीयहरूको सक्रियताले पुनः ब्युँताइएको छ । लुम्बिनी प्रदेश सरकारको सहयोग र वडाको सक्रियतामा यहाँ पर्यटकका लागि आवश्यक पूर्वाधार निर्माण गरिएका छन । सुविधासम्पन्न सामुदायिक भवन छ, जहाँ सेमिनार र कार्यक्रमका लागि सभाहलको समेत ब्यबस्था रहेको पिपलडाँडामा व्यवस्थित पिक्निक स्पट, खानेपानी, बिजुली र आधुनिक शौचालय निर्माण हुनुले पिपलडाँडा वनभोज स्थलको रुपमा बिकसित हुदै गएको छ । साथै आरामदायी विश्रामस्थल पदयात्री र पर्यटकका लागि बनाइएका प्रतिक्षालय पनि पिपलडाँडाको बिशेषता भित्र पर्दछ ।
स्थानीय समाजसेवी हरि बहादुर घर्ती यस क्षेत्रको संरक्षणमा व्यक्तिगत र सामाजिक रूपमा निरन्तर लागिरहनुभएको छ। उँहा भन्नुहुन्छ “हाम्रो सम्पदा जोगाउनु हामी सबैको कर्तव्य हो,” अब यसलाई जोगाउन नयाँ पुस्ताले यसको प्रचारप्रसारमा जोड दिनु पर्दछ। वडा अध्यक्ष बोम बहादुर ठाडा पिपलडाँडालाई नमूना पर्यटकीय केन्द्र बनाउन प्रतिबद्ध देखिनुहुन्छ। वडा अध्यक्ष ठाडा भन्नुहुन्छ, “आधारभूत संरचना तयार भइसकेका छन्, अब हाम्रो प्राथमिकता व्यापक प्रचारप्रसार गरी पर्यटक भित्र्याउनु हो।” सम्पूर्ण पाल्पाली र छिमेकी जिल्लाका बासिन्दालाई पिपलडाँडाको अवलोकनका लागि निमन्त्रणा समेत उँहाले गर्नुभएको छ। माडी सेरोफेरोका लागि नजिक रहेको र यातायातको सहज पहुँच भएको पिपलडाँडा शैक्षिक भ्रमण, पारिवारिक वनभोज, दृश्य अवलोकन र फोटोग्राफीका लागि उत्कृष्ट थलो हो। पूर्वाधारले सुसज्जित यो क्षेत्र अब आन्तरिक र बाह्य पर्यटकको आगमनसँगै नयाँ पर्यटकीय हब बन्ने निश्चित जस्तै छ, त्यसको लागि स्थानीयबासी र २ नम्बर वडाले प्रचार प्रसार मै ध्यान दिनु पर्दछ ।
