साहित्यिक गतिविधिमा अग्रपंक्तिमा रहेका जिल्लाहरु मध्ये पाल्पा पनि एक हो । पाल्पामा धेरै साहित्यकारको जन्म भएको छ । यिनै साहित्यकारहरूको पुस्तक पढन पाउँदा मन खुसी हुन स्वभाविक पनि हो । हुन त जुनसुकै साहित्य आफैमा यस्तो चिज हो जति गहिराइमा पुगेपनि मुहानको गहिराइ नाप्न सकिन्न । आज म साहित्यकारको भन्दापनि पुस्तक पढेपछि उठेका केही कुरा लेख्दै छु।
पाल्पाली साहित्यकारको नाम लिँदा पाल्पाली साहित्यकार पुष्करराज रेग्मीको नाम पनि अग्रपङ्तीमा आउने गर्दछ । उनी कविताको लघुत्तम विधा शीत र त्रिशुलका परिकल्पनाकार पनि हुन् । स्व: माता पिता राधादेवी रेग्मी, बद्रीप्रसाद रेग्मीका सुपुत्र पुष्करराज रेग्मीको पुस्तक अपूर्व दर्शन ऐतिहासिक बालकथा संग्रह पढ्ने अवसर मिल्यो । यो पुस्तक पढन भन्दा पहिला खोलको कुरो गर्ने हो भने अति रमणीय देखिन्छ । पाल्पाका महत्त्वपूर्ण धार्मिक तथा पर्यटकीय स्थलको चित्रहरुले सजिएको छ । भित्र पन्ना पल्ट्यार हेर्दा यो पुस्तक स्व:माता पिता र दिदी अम्बिका रेग्मीको चरणमा समर्पण गरिएको छ ।
यस पुस्तक भित्र पाल्पा साहित्य समाजका संरक्षक राजेन्द्र गोपाल सिंहको भूमिका छ भने दामोदर ढकाल दीपकको शुभकामना रहेको छ । लेखको मन्तब्यको साथ साहित्यकार सीता बिष्ट कार्की सीबिकाको प्रकाशकीय रहेको छ।
बालकथा संग्रहमा जम्माजम्मी आठ बालकथा छन । रुरुकन्याको कथा, रम्भपानीको कथा, सत्यवती बज्यैको कथा, वाख्खै ह्वा वाख्खैको कथा, भैरवनाथको कथा, जात्रै जात्राको शहरको कथा, उजिर सिंहको र रानीमहलको कथा । शीर्षकबाट पनि पुस्तक ऐतिहासिक भएको स्पष्ट बुझिन्छ । लेखकले यसलाई बालकथाको रुपमा निकाले पनि पाल्पाको धार्मिक महत्वका कथालाई बाल कथाको रूपमा प्रस्तुत गरेका छन जुन सानो पुस्तकको रुपमा आएका छन । पुस्तक ठूलो र बाक्लो हुँदैमा मात्र सफल हुन्छ भन्ने कुरालाई चुनौती नै दिएको छ । यो पुस्तक आफैमा ऐतिहासिक बनेको छ। सबै ऐतिहासिक कुरालाई सरल, सहज तरिकाले लेखिएको छ जुन एउटा राम्रो पक्ष हो । यो पुस्तक बालबालिकालाई लक्षित गरी लेखिएको छ जसले गर्दा सानै उमेरबाट नै पाल्पालका धर्मिक स्थलहरू बाल मस्तिष्कमा छापिने छन । यो भविष्यको लागि राम्रो पक्ष हो । शीर्षकहरू सबै ऐतिहासिक नामबाट छन । यो पुस्तक बालकथा संग्रह भएपनि बालबच्चा देखि सबैलाई उपयोगी रहेको म ठान्दछु किनकि बालकथाको रुपमा लेखिए पनि यो पुस्तक पढ्दा पाल्पाको धार्मिक महत्वका धेरै कुराको ज्ञान लिन सकिन्छ । पुस्तकको पछाडि पट्टी खोलमा लेखकको फोटो संग प्रकाशित कृतिहरुको फोटो राखिएको छ । लेखकको परिचय भने राखिएको छैन।
अन्तमा पाल्पाली वरिष्ट साहित्यकारको उपाधि पाइसकेका पुष्करराज रेग्मी अथकका दर्जनौं पुस्तक प्रकाशित भएका छन।उनको साहित्यिक यात्रा अविरल चलिरहोस्।पुस्तकहरू प्रकाशित भइरहनु। साहित्यिक यात्राले शिखर चुमोस । शुभकामना।
नारायण कोइराला
तानसेन पाल्पा
