तितोपाटी – सोमालियाको दक्षिणी क्षेत्रस्थित एक सैन्य शिविरमा इस्लामिक विद्रोहीले सोमबार भीषण आक्रमण गरेका छन् । स्थानीय सञ्चारमाध्यमका अनुसार अल–सबाब विद्रोही समूहले गरेको आक्रमणमा परि कम्तीमा २७ सैनिको ज्यान गएको छ ।
बीबीसीका अनुसार विद्रोहीले बिहानको प्रार्थना गरिरहेका सैनिकमाथि आक्रमण गरी उनीहरूको ज्यान लिएको विद्रोही समूहले दाबी गरेको छ ।
एक सोमाली सैनिक अधिकारीले किस्मायो सहरबाट करिब ५० किलोमिटर टाढाको घटनास्थलमा थप सैनिक बल पठाइएको जनाएका छन् । अल–सबाब १० वर्षदेखि सोमालियामा विद्रोह गर्दै आएको समूह हो । अल–सबाबका प्रवक्ता अब्दियासिस अबु मुसाबले आफूहरूले सैनिकमाथि आक्रमण गरेपछि कतिपय नजिकैको जंगलतर्फ भागेर ज्यान जोगाएको दाबी गरे । रोयटर्स समाचार संस्थासँग कुरा गर्दै उनले ‘बम तथा गोलीको आवाज किस्मायोसम्म सुनिएको’ बताए ।
