अक्षर दुई त बर्ग भित्र परेको धन हो ।
मनका इक्षा सम्पन्न गर्ने गर्दछ जनको ।१ ।
धनको साथ सम्पन्न हुन्छ कलिको नाटक ।
लोकमा आज अनेक थरी देखिन्छ चटक ।२।
मपाईँ ताल बजाई दिँदा बेसरी नाच्दछ ।
अहम भाका गाएमा गीत कम्मर भाँच्दछ ।३।
दुनियाँ बन्यो बहिरो अन्धो पापी र पाखण्डी ।
पातकी दुष्ट बापती गुण्डा जाली र घमण्डी ।४।
पशुको जस्तो चरित्र गर्ने भोग र बिलाश ।
अध्यन खोज चिन्तन सबै मदिरा भरोसा ।५।
पिएर लट्ठ कुनामा सुत्दा सँसार बशमा ।
देखेका सबै सपना जति हराए होशमा ।६।
शिवले पनि एउटा आँखा धनमा लगाए ।
दुनियाँ पनि यसैको राग गाएर रमाए ।७।
धनले गर्दा जहान छाडी बिदेश भगायो ।
महिना दिने बालक आमा बिछोड बनायो ।८।
प्रेमिका सङ्ग सुहाग रात यसैले मनायो ।
गरीब धनी पर्गेल्न भनी खाडल खनायो ।९।
कसैको सित्तै जवानी माथि कवाज खेलायो ।
युवक जोश उर्लेको बैँस छिनमै सेलायो ।१०।
आफन्त बीच कल्मष भर्ने धन हो साधन ।
कहिले काहीँ बिर्साई दिन्छ घरका जहाँन ।११।
भाइको बीच सम्पर्क टुट्यो मायाको मरण ।
हातले दियो खुट्टाको सास्ती भो बिना कारण ।१२।
घनिष्ठ मित्र हृदय भित्र कुनामा बसेको ।
धनको हावी बढेर जाँदा मित्रता खसेको ।१३।
जसले सक्यो महत्व बुझ्न सौभाज्ञ बढायो ।
नबुझ्नेलाई अल्पत्र पारी कुनामा लडायो ।१४।
चिनेमा मात्र साधन बनी मद्दत गर्दछ ।
नचिन्ने जन अन्योल साथै अल्पत्र पर्दछ ।१५।
हरि शर्मा (सुबेदी)
नुवाकोट-गलकोट, बागलुङ नेपाल
हाल: मिसिगन अमेरिका ।
