तोयानाथ उपेक्षित – गुरुङ समाजको अर्को परिचयात्क शव्द तमु पनि हो । संसारभरका गुरुङहरु आफूलाई तमु भन्न रुचाउछन । सोझो र शुरो यो जाति नेपालको पूर्व देखि मध्य पश्चिम सम्म छरिएर रहेको पाईन्छ । नेपालमा रहेका आदिवासी जनजातिहरुमा गुरुङहरुको संख्या उल्लेख्य छ । खास गरेर गण्डकी अञ्चल र आसपास नै गुरुङहरुको मुख्य थाकथलो मानिन्छ ।
आफ्नै भाषा, भेष-भुषा र संस्कृतिका धनि गुरुङहरु देश र विदेशमा छरिएर रहेका छन । उनिहरु जहाँ छन त्यहाँ आफ्नो अस्तित्वको रक्षा र पहिचानको खातिर एकताबद्ध भएर रहेको देखिन्छ । कुवेतमा पनि गुरुङहरुको तमु समाज सन २००९ देखि अस्तित्वमा रहेको छ । यहाँ रहेका जातिय संस्था मध्ये तमु समाजले आफूलाई पहिलो जातिय संस्था भनेर दावी गर्दछ ।
सन २००९ डिसेम्बर २५ को पहिलो अधिवेशनले तत्कालिन संस्थापक अध्यक्ष अम्बर गुरुङलाई तमु कुवेत को जिम्मेवारी सुम्पेको थियो । तिन बर्षे कार्यकाल रहने तमुको विधान मुताविक सन २०१२ अक्टोवर ५ मा भएको दोश्रो अधिवेशनले खोप गुरुङलाई अध्यक्ष बनायो । सेप्टेम्बर २५ सन २०१५ को तेश्रो अधिवेशनले सर्वसम्मतीमा खोप गुरुङलाई नै थप अर्को कार्यकालको पनि जिम्मा लगाएको पाईन्छ ।
तमु समाज कुवेतको चौथो अधिवेशन २१ सन २०१८ मा सम्पन्न भयो । उक्त अधिवेशनले राजु गुरुङलाई नेतृत्वमा चुन्यो । तमु समाज कुवेतले आफ्नो चाडपर्व र विभिन्न सामाजिक गतिविधी गर्दै आएको भए पनि खोप गुरुङको पालामा तमुले कुवेत स्थित केन्द्रिय रक्त बैंक जाव्रियासँग समन्वय गरेर सामुहिक रक्तदान कार्यक्रमको शुरुवात गर्यो । उक्त कार्यक्रम हरेक बर्ष नियमित रुपमा हुदै आएको छ । अन्य संघ संस्थाको भन्दा पृथक र मानविय सेवामा अव्वल कार्यको थालनि गर्ने तमुको श्रेय पहिलो पटक नेपाली दूतावासले ग्रहण गरेको थियो । तमु समाजले पहिलो रक्तदान कार्यक्रम गरेको भए पनि व्लड बैंकले भने नेपाली राजदूतावास कुवेतलाई मेमेन्टो प्रदान गरेको थियो ।
खोप गुरुङको विरासत थाम्दै आएका बर्तमान अध्यक्ष राजु गुरुङ पुरानो समितिका उत्तिकै क्रियाशिल व्याक्ति हुन । उनको कार्यकालमा पनि तमु समाज अरु शसक्त हुने विश्वास तमुहरुको रहेको छ ।
कुवेतमा तमु समाजले कुवेतमा रहेका अन्य संघसंस्थासँग समन्वय र सहकार्य गरेर अनेकौ कामहरु गर्दै आएको छ । यसरी नै बार्षिक रुपमा ल्होछार विशेष यहाँका तमुहरुले विशेष उल्लासका साथ मनाउदै आएका छन । शालिन र भद्र संस्थाका रुपमा आफ्नो परिचय दिन सफल तमुहरु कुवेतमा तालीका हकदार हुन भन्दा अतिशोयुक्ति नहोला ।
