इस्लामाबाद: पाकिस्तानको सेनाको जनसम्पर्क विभाग (ISPR) ले पछिल्लो २४ घण्टामा खैबर पख्तुनख्वा र बलुचिस्तान प्रान्तमा सञ्चालन गरिएका संयुक्त सुरक्षा अभियानका क्रममा ३२ जना लडाकु मारिएको दाबी गरेको छ।
आईएसपीआरद्वारा जारी विज्ञप्तिअनुसार ती अभियानहरू चरमपन्थी समूहहरू र उनीहरूलाई सहयोग गर्ने नेटवर्कविरुद्ध सञ्चालन गरिएको थियो।
Inter-Services Public Relations (आईएसपीआर) का अनुसार जुलाई २८ र २९ को राति प्राप्त गोप्य सूचनाका आधारमा खैबर जिल्लामा विभिन्न स्थानमा सुरक्षा अभियान सञ्चालन गरिएको थियो।
विज्ञप्तिमा भनिएको छ कि सुरक्षा बलहरूले चरमपन्थीहरूको लुक्ने स्थानलाई लक्षित गरी कारबाही गर्दा ‘फितना अल-खारिज’ सँग आबद्ध २४ जना लडाकु मारिएका छन्।
त्यसैगरी, बलुचिस्तानको नुश्की जिल्लामा पनि गोप्य सूचनाका आधारमा सञ्चालन गरिएको अर्को अभियानका क्रममा सुरक्षा बल र लडाकुबीच भएको भिडन्तमा थप आठ जना लडाकु मारिएको आईएसपीआरले जनाएको छ।
सुरक्षा बलहरूले अभियानका क्रममा ठूलो मात्रामा हतियार, गोलाबारुद तथा विस्फोटक सामग्री बरामद गरेको र ती सामग्रीलाई पछि नष्ट गरिएको पनि विज्ञप्तिमा उल्लेख गरिएको छ।
यद्यपि, पाकिस्तान सेनाको उक्त दाबी स्वतन्त्र रूपमा पुष्टि हुन सकेको छैन, र घटनाबारे सम्बन्धित सशस्त्र समूहहरूबाट तत्काल कुनै प्रतिक्रिया सार्वजनिक भएको छैन।
