साउदी अरबले इराकमा रहेका इरान समर्थित मिलिसिया समूहका ठेगानामाथि बुधबार लक्षित हवाई आक्रमण गरेको जनाएको छ। साउदी रक्षा मन्त्रालयका अनुसार उक्त कारबाही अमेरिकी सेनाको सेन्ट्रल कमान्ड (CENTCOM) सँग समन्वयमा गरिएको हो। रियादले पछिल्ला दिनहरूमा इरान समर्थित समूहहरूले साउदी तेल प्रतिष्ठानमाथि ड्रोन आक्रमण गरेको आरोप लगाउँदै त्यसको जवाफी कारबाहीका रूपमा यो कदम चालिएको बताएको छ।
साउदी रक्षा मन्त्रालयले आफूहरू क्षेत्रीय तनाव बढाउने पक्षमा नरहेको तर आफ्नो भूमिमाथि हुने कुनै पनि आक्रमणको जवाफ दिने चेतावनी दिएको छ। मन्त्रालयको भनाइमा, इराकमा रहेका ती समूहहरू साउदी ऊर्जा संरचनामाथि भएका आक्रमणसँग सम्बन्धित थिए।
अमेरिकी सेनाको सेन्ट्रल कमान्ड (CENTCOM) ले पनि साउदी सेनासँग मिलेर इराकमा इरान समर्थित आतंकवादी समूहविरुद्ध सटीक आक्रमण गरिएको पुष्टि गरेको छ। अमेरिकी सेनाका अनुसार ती समूहहरूलाई इरानको इस्लामिक रिभोलुसनरी गार्ड कोर्प्स (IRGC) ले अमेरिकी सेना र साउदी ऊर्जा संरचनामाथि आक्रमण गर्न निर्देशन दिएको थियो।
अमेरिकी सेनाले भने हालैका आक्रमणहरूमा अमेरिकी सुरक्षाकर्मीलाई ठूलो क्षति पुर्याउने प्रयास सफल नभएको जनाएको छ। यो घटनाले खाडी क्षेत्रमा साउदी अरब, अमेरिका र इरान समर्थित समूहबीचको तनाव अझ बढ्ने संकेत गरेको छ।
