इरान–अमेरिका वार्तामा मध्यस्थको भूमिका निर्वाह गरेपछि पाकिस्तानले अमेरिकासँग १० अर्ब अमेरिकी डलर बराबरको आर्थिक सहायता सुविधा (Exchange Stabilisation Support Facility) मागेको खुलासा भएको छ। स्रोतहरूका अनुसार पाकिस्तानले आफ्नो विदेशी मुद्रा सञ्चिति बढाउन, पाकिस्तानी रुपैयाँमाथिको दबाब कम गर्न र अन्तर्राष्ट्रिय मुद्रा कोष (IMF) माथिको निर्भरता घटाउने उद्देश्यले यस्तो प्रस्ताव अघि सारेको हो।
रिपोर्टअनुसार पाकिस्तानका अर्थमन्त्री मुहम्मद औरङ्गजेबले अमेरिकी अर्थमन्त्री स्कट बेसेन्टसमक्ष अधिकतम पाँच वर्ष अवधिको द्विपक्षीय वित्तीय सहयोग सुविधा प्रस्ताव गरेका हुन्। यदि यो प्रस्ताव स्वीकृत भयो भने, पाकिस्तानको कमजोर अर्थतन्त्रलाई ठूलो राहत पुग्ने अपेक्षा गरिएको छ।
हाल पाकिस्तान आईएमएफको ७ अर्ब डलरको कार्यक्रमअन्तर्गत कडा कर सुधार, सरकारी खर्च कटौती र आर्थिक सुधारका कार्यक्रम लागू गरिरहेको छ। यस्तो अवस्थामा अमेरिकी सहयोग प्राप्त भए विदेशी मुद्रा सञ्चिति बलियो हुने, रुपैयाँ स्थिर रहने तथा बाह्य ऋण व्यवस्थापन सहज हुने विश्वास गरिएको छ।
यो आर्थिक सहयोगको प्रस्ताव पाकिस्तानले हालै इरान–अमेरिका तनाव कम गराउन खेलेको कूटनीतिक भूमिकापछि आएको हो। विश्लेषकहरूका अनुसार इस्लामाबादले आफ्नो बढ्दो कूटनीतिक प्रभावलाई आर्थिक लाभमा रूपान्तरण गर्ने प्रयास गरिरहेको देखिन्छ।
यद्यपि, अमेरिकी सरकार वा पाकिस्तान सरकारले यस प्रस्तावबारे औपचारिक प्रतिक्रिया सार्वजनिक गरेका छैनन्। त्यसैले १० अर्ब डलरको यो सहायता सुविधा स्वीकृत हुन्छ वा हुँदैन भन्ने विषय अझै अनिश्चित रहेको छ।
