कुवेतले आफ्नो भूमिमाथि भएको भनिएको इरानी आक्रमणको कडा शब्दमा निन्दा गर्दै, विद्युत् उत्पादन तथा समुद्री पानी प्रशोधन (डिसालिनेसन) केन्द्रलाई समेत लक्षित गरिएको जनाएको छ।
कुवेतको विदेश मन्त्रालयले जारी गरेको विज्ञप्तिमा बारम्बार नागरिक पूर्वाधार र अत्यावश्यक संरचनामाथि आक्रमण हुनु नागरिक सुरक्षामाथिको गम्भीर खतरा भएको तथा अन्तर्राष्ट्रिय कानुनको उल्लङ्घन भएको उल्लेख गरेको छ।
मन्त्रालयका अनुसार यस्ता आक्रमणहरूले नागरिक सुविधा र महत्वपूर्ण पूर्वाधारलाई योजनाबद्ध रूपमा निशाना बनाउने शत्रुतापूर्ण नीति झल्काउँछन्। कुवेतले यस आक्रमण र त्यसबाट उत्पन्न सबै परिणामको पूर्ण जिम्मेवारी इरानमाथि राख्दै तत्काल सबै आक्रमण रोक्न माग गरेको छ।
साथै, विज्ञप्तिमा संयुक्त राष्ट्रसंघको बडापत्रको धारा ५१ अनुसार कुवेतलाई आफ्नो राष्ट्रिय सुरक्षा, सार्वभौमसत्ता तथा महत्वपूर्ण पूर्वाधारको रक्षा गर्न आवश्यक सबै कदम चाल्ने अधिकार रहेको पनि स्पष्ट पारिएको छ।
