कुवेतमा भोलिदेखि नेपाली चलचित्र‘अगस्त्य’ प्रदर्शन हुने भएको छ । कुवेतको इतिहासमा पहिलो पटक सेभेन सिसको सहकार्यमा निरेम प्रोडक्सनले सिनेस्केप अन्तरर्गत बक्सअफिसमा नेपाली चलचित्र प्रदर्शन गर्न लागेको हो । विगतमा चलचित्र च्यारिटि शोहरु भने गरिएको थियो ।
निरेम प्रोडकसनका प्रेम जिमिका अनुसार “ अगस्त्य” भोलिबाट कुवेतका तिन शहरहरु फाहेलको एजियाल मल , साल्मियाको अलफनार मल र खैतान स्थित त्रियोमलमा रहेको ओजन सिनेमाहलमा प्रदर्शन हुनेछ । सिनेस्केपको समय ९ बजे वेलुकी रहेको छ भने ओजन सिनेमामा ८ः३० बजे बेलुकी चलचित्र लाग्ने छ । टिकटको लागि काउन्टर बाटै लिन सकिन्छ भने अग्रिम बुंकिगको लागी सिनेस्केप र ओजन सिनेमाको एप तथा वेबसाईड गएर लिन सकिने छ ।
सौरभ चौधरीको लेखन तथा निर्देशन रहेको फिल्म सौगात मल्ल, नाजिर हुसेन, मलिका महत, प्रमोद अग्रहरी, विजय बराललगायतको मुख्य भूमिका रहेको छ । प्रकाश मल्ल, अनिष तामाङ र विश्वप्रकाश गौचन निर्माता रहेको फिल्मको छायांकार सञ्जय लामा हुन् । दुई च्याप्टरमा बन्ने ‘अगस्त्य’ को दुवै श्रृंखलाको कथा निर्देशक चौधरीले लेखेका हुन् । चलचित्रका मुख्य नायकद्धय सौगात मल्ल र नाजिर हुसेनको गेटअप सार्वजनिक भएपछि फिल्मको चर्चा चुलिएको थियो । चलचित्रले नेपाली बक्स अफिसमा राम्रै चर्चा कमाइरहेको छ ।
