अफगानिस्तानमा मंगलबार राति गएको भूकम्पमा परी कम्तीमा २ सय ८० भन्दा बढिको मृत्यु भएको र दर्जनाै घाइते भएको त्यहाँको सरकारी समाचार एजेन्सीले जनाएको छ । ६.१ रेक्टर स्केलको उक्त भूकम्प दक्षिणपूर्वी सहर खोस्टबाट ४४ किलोमिटर टाढा गएको थियो ।
अफगानिस्तानको दक्षिण-पूर्वी शहर खोस्टभन्दा ४४ किलोमिटरको दूरीमा रहेको स्थानलाई केन्द्र बनाएर भूकम्प गएको बीबीसीले लेखेको छ । स्थानीय न्यूज एजेन्सीका अनुसार अहिलेसम्म ६०० भन्दा बढि घाइतेको विवरणहरू प्राप्त भएका छन् ।
भूकम्पको धक्का अफगानिस्तानको राजधानी काबुल र छिमेकी देश पाकिस्तानमा समेत महसुस गरिएको युरोपियन मेडिटेरिनियन सिस्मोलोजिकल सेन्टरलाई उद्धृत गर्दै अन्तर्राष्ट्रिय समाचार संस्था रोयटर्सले बताएको छ ।
भूकम्पबाट सबैभन्दा धेरै क्षति अफगानिस्तानको पक्तिका प्रान्तमा भएको छ । रातिमा मानिसहरू सुतिरहेको समयमा भूकम्प गएकोले धेरै क्षति हुनसक्ने अनुमान गरिएको छ ।
अफगानिस्तान भूकम्पीय जोखिभ भएको मुलुकमा पर्दछ भने विगत १० वर्ष भित्रको तथ्यांक हेर्दा अफगानिस्तानमा भूकम्पमा परी ७ हजारभन्दा बढी मानिसको मृत्यु भएको संयुक्त राष्ट्रसंघको मानवीय मामिला समन्वय कार्यालयले जनाएको छ । भूकम्पबाट वार्षिक औसत ५६० जनाको मृत्यु हुने गरेको छ ।
