चालू आर्थिक वर्षको ७ महिना (साउन–माघ) मा नेपालको निर्यात बृद्धिदर ७.६ प्रतिशतमा सिमित भएको छ । नेपाल राष्ट्र बैंकका अनुसार चालू आर्थिक वर्षको ७ महिनामा कुल निर्यात ७.६ प्रतिशतले वृद्धि भई कुल ६९ अर्ब ९२ करोड रुपैयाँ पुगेको हो ।
जब कि अघिल्लो वर्षको सोही अवधिमा यस्तो निर्यात २२.४ प्रतिशतले बृद्धि भएको थियो । गत वर्षको तुलनामा यस वर्षको निर्यात वृद्धिदरमा अधिकतम १६.८ प्रतिशतले संकुचन आएको हो । बैंकका अनुसार सो अवधिमा वैदेशिक व्यापार निर्यात गन्तव्यका आधारमा भारततर्फ १० प्रतिशतले र अन्य मुलुकहरुमा ४.९ प्रतिशले निर्यात वृद्धि भएको छ । तर, यता चीन तर्फ भने यो समयमा ४७.७ प्रतिशतले नै निर्यात घटेको बैंकको भनाई छ ।
यता, आयाततर्फ भने गत वर्षको तुलनामा चालू आर्थिक वर्षको ७ महिनामा करिब स्थिर जस्तै रहेको बैंकले जनाएको छ । गत वर्ष ३.६ प्रतिशतले आयात घट्दा यस वर्ष ०.०१ प्रतिशतले मात्र वृद्धि भई रु ८०३ अर्ब ६४ करोड सामान आयात भएका छन् । राष्ट्र बैंकको तथ्याङ्कलाई हेर्दा चालू आर्थिक वर्षको ७ महिनाको व्यापार घाटा ७३३ अर्ब ३१ करोड रहेको देखिन्छ ।
-रातोपाटीबाट
