बेसीसहर नगरपालिका– ७ साम्दीका ६९ वर्षीय हरिबहादुर थापाले चितुवासँग जुधेर आफ्नो ज्यान मात्रै बचाएनन्, चितुवाको ज्यानै लिएका छन् । आइतबार बिहान खेतबाट घाँस काटेर घर फर्किरहेका नेपाली सेनाका पूर्वलप्टन हरिबहादुरलाई चितुवाले एक्कासि आक्रमण गऱ्याे । तर, उनी डराएनन्, उल्टो चितुवामाथि जाइलागे । ‘बिहान ८ बजेको घटना हो,’ हरिबहादुरले भने, ‘चितुवा एक्कासि ममाथि जाइलाग्यो । मैले गुहार नै माग्न पाइनँ, एक्कासि कोपार्न आएको चितुवाले मलाई लडायो । हातमा हँसिया थियो । अन्दाधुन्द हानेँ । चितुवाको टाउको र मुखमा लागेछ । चितुवाले झनै झम्ट्यो । मैले फेरि हँसियाले अन्दाधुन्द हानेँ । चितुवा केही पर गएर लम्पसार पऱ्याे ।’ त्यसपछि दौडेर चिच्याउँदै घर आएको उनले बताए ।
उनकी श्रीमती सीता थापाले भने चितुवाले श्रीमानलाई मारेछ कि भन्ने ठानेको बताइन् । तर, चितुवा नै घाइते भएको देख्दा अचम्म लागेको सुनाइन् । उनी भन्छिन्, ‘चितुवासँग भिडेको अन्तिम समयमा मात्रै थाहा पायौँ ।’हरिबहादुरको पाखुरामा र हातमा चितुवाले चिथोरेको छ । उनको लमजुङ जिल्ला सामुदायिक अस्पतालमा प्रारम्भिक उपचारपछि थप उपचारका लागि काठमाडौं लगिएको जिल्ला प्रहरी कार्यालय लमजुङका प्रमुख डिएसपी गंगाबहादुर थापाले बताए । हरिबहादुरलाई आक्रमण गर्ने चितुवा डेढ वर्षको पोथी चितुवा भएको उनको भनाइ छ । मारिएको चितुवालाई डिभिजन वन कार्यालय परिसरमा गाडिएको छ ।
-नयाँपत्रिका दैनिकबाट
