पूर्णिमा गयो सुटुक्कै फेरि शुरु भो जात्रा यो ।
गाईको जात्रा भएको नाम मान्छेको जात्रा हो । १।
नेताको जात्रा चलेकै बेला कोरोना आएको ।
कोरोना जात्रा लुकेर भित्र गुम्सिनु परेको । २।
कुकर्म गर्ने कुजात नेता कुनामा लुकेका ।
क्यान्सर, कोर कोरोना केही नटेरी बसेका । ३।
छुचुन्द्रो जस्तो यिनको मुख सियोले सिलाए ।
क्यान्सर लागे कोरले कतै पाखुरा डल्याए । ४।
कोरोना लागि मजाले त्यहाँ कुनामा थच्च्याए ।
उत्तम हुने यिनले यहाँ देश नि खोक्र्याए । ५।
प्रचण्ड ओली मगन्ते झोली माधव नेपाल ।
पौडेल बाजे मिलेन कुर्सी समाए कपाल । ६।
शेरेले छेरे कुनामा बसी काँग्रेस हरायो ।
उनको पाला काँग्रेस पनि बेहाल गरायो । ७।
उखाने नेता छेरौटे बेथा बेथाले सुतेका ।
गुम्छ कि कतै कुर्सी त्यो भनी नसुती जागेका। ८।
बन्दैन देश उखान हाली बिकाश बन्द छ ।
कसरी कुर्सी थमौंने मात्र उनको धन्दा छ । ९।
प्रचण्ड गुण्डा गुण्डाका नेता छेपारा जस्ता छन् ।
गडौँला जस्तै अगाडि अनि पछाडि सर्दछन् । १०।
दुनियाँ लुटी रगत चुसी अघाए जुको झैं ।
जनता जति खाडिमा गए सुकेका सिन्को झैँ । ११।
बाबुरामले देखाए जात्रा पोइल गएर ।
छिनको छिन फेरेका दल बेसारे भएर । १२।
बामदेवले हलीको शान पाएको पैले हो ।
झगडा ऐले गरेको किन गोठालो हुन हो । १३।
खनाल झल छलको बल अगाडि पछाडि ।
काटेका शिर झापामा अझै रहेका लघारी । १४।
बामेले ऐले कुर्सीको लागि बोकेका श्रीमती ।
बिनास काल उल्टिन्छ बुध्दि सम्झाउँ खै कति । १५।
मन्त्रीको कुर्सी कोरोना सर्ने माध्यम बन्यो रे ।
नलड अब कुर्सीको लागि कालले भन्यो रे । १६।
हरि शर्मा (सुबेदी)
नुवाकोट-गलकोट, बागलुङ नेपाल
हाल: मिसिगन अमेरिका ।
