तोयानाथ उपेक्षित – कुवेत सरकारको मन्त्रीमण्डलले भोलीबाट लागु हुने गरी २६ मार्च सम्म १४ दिनको लागि सार्वजनिक विदा दिने घोषणा गरेको छ । कोरोना भाईरसको बढदो प्रकोप रोक्न यस्तो कदम उठाईएको बताईएको छ । शुक्रवार मध्यान्हबाट अर्को शुक्रवार सम्मका लागि सबै हवाई सेवा पनि बन्द हुने भएको छ ।
गत महिना फेब्रुअरी २४ का दिन कोरोनाको संक्रमण कुवेतमा देखिए यता स्कुल र कलेजहरु भने बन्दै थिए । अहिले गरिएको घोषणा अनुसार प्राईभेट कम्पनीहरुको हकमा सार्वजनिक विदा हो होईन स्पष्ट भईसकेको छैन । कुवेतमा पछिल्लो तथ्यांक अनुसार कोरोना भाईरसको संक्रमण ७२ जनामा देखिएको छ र ति मध्ये अधिकांश कुवेत बाहिरबाट प्रवेश गर्नेहरु नै भएको बताईन्छ, त्यसमा पनि ठुलो संख्या ईरानबाट आउनेहरुको रहेको छ ।
पछिल्लो अपडेट अनुसार कुवेतका विभिन्न ठाउँमा क्वारेन्टाईन केन्द्र बनाएर राखिएका ८३१ जना मध्ये ७२ जना संक्रमित छन जस मध्ये ५ जनाको अवस्था गंभिर छ भने ५ जना ठिक भएर घर फर्किएका छन । जुलैया स्थित एलजोन रिर्सोटमा ईराकबाट ल्याईएका कुवेतका नागरिक १०५ जना छन । यसरी नै ईरान तथा ईटली, थाईल्याण्ड, सिंगापुर, कोरिया लगायत विभिन्न कोरोना प्रभावित देशहरुबाट कुवेत ल्याईएका मध्ये खैरान रिर्सोटमा ५८० जना र मंगाफ स्थित अलकुत विच होटलमा १४६ जनालाई राखिएको छ ।
ईरानबाट आउने निजी डुंगा तथा मछुवाराहरुको आवागमनबाट कुवेतमा कोरोना भित्रिएको आशंका पनि गरिएको छ तर कुवेत सरकारले आधिकारिक रुपमा यहाँ भित्रभित्रै के कति जना संक्रमित छन भन्ने खुलाएको छैन । ईरानमा कोरोनाको डरलाग्दो प्रकोपबाट अधिकांश खाडी राष्ट्रमा कोरोनाको विस्तार भएको पाईन्छ ।
कुवेत सरकारले कोरोनाको प्रकोप फैलन नदिन १६ वटा देशमा जाने आउने हवाई सेवा पनि केही दिन पहिलेबाट नै बन्द गरेको छ तर नेपालमा जाने हवाई सेवा भने बन्द गरेको छैन । दक्षिण एषियाली मुलुक भारत, श्रीलंका र बंगलादेशमा कुवेतबाट हुने सिधा उडानहरु बन्द छन । आगामी शुक्रवारबाट एक साताका लागि सबै यात्रु विमानहरु बन्द हुनेछन । कार्गो विमानहरु भने यथावत नै चल्ने छन ।
कोरोनाले गर्दा आजको निर्णयले लगभग कुवेत सेमी लक डाउनको अवस्थामा पुगेको छ । यसबीच कुवेतका सरकारी तथा गैह सरकारी कार्यलय, स्कुल, कलेज तथा होटल र रेष्टुरेन्टहरुमा सानीटाईजिंग गर्ने गराउने काम पनि तिव्र गतिले भईरहेको छ भने स्वयं स्वास्थ्य मन्त्रीले दुई दिन पहिले मात्र कुवेतको विमानस्थलमा कोरोना भाईरस नियन्त्रणका लागि एन्टि व्याक्टेरियल केमिकलले स्प्रे गर्नु भएको भिडियो सार्वजनिक भएको थियो ।
कुवेतमा भाईरस नियन्त्रणको प्रयासलाई युद्धस्तरमा अघि बढाईएको कुरा यहाँको सरकारले उठाएका अनेकौ कदमहरुबाट देख्न सकिन्छ । गत फेब्रुअरी २७ तारिक यता कुवेत प्रवेश गरेका कसैले पनि १४ दिन सम्म काममा जान पाउँदैनन् । उनीहरुलाई सम्बन्धित कम्पनीले अलगै राख्न पर्ने नियम जारी गरेको छ भने तिनीहरुले अव स्वास्थ्य परिक्षण अनिवार्य रुपमा गराउन पर्ने हुन्छ । मार्च १२ बाट कुवेतको मिसरफ स्थित ईन्टरनेश्नल फायर्स ग्राउण्डको हल नम्बर ६ मा जानु पर्ने हुन्छ ।
जहारा प्रशासनिक निकाय अन्तरगतका विदेशी नागरीकले १२ मार्चमा, मुवारक अल कविर अन्तरगतका लागि १३ मार्चमा, फरवानियाका लागि १४ मार्च, हवालीका लागि १५, अहमादीका लागि १६ र क्यापिटल अल असिमाका लागि १७ मार्चमा स्वास्थ्य परिक्षण गराउने गरी तोकेको छ । जसका लागि सिभिल आईडी र पासपोर्ट अनिवार्य साथमा हुन पर्ने छ । यदि कसैले मार्च २७ यता कुवेत आएर स्वाथ्य परिक्षणका लागि नगएमा उसले कानून बमोजिम दण्ड र सजाय व्यहोर्न पर्ने हुन्छ ।
यसबीच भोलीबाट २६ मार्च विचमा वैंकहरूको अनलाई सर्भिस चालु रहने छ सवै सबै एटिएम मेसिनहरु खुल्ला रहनेछन ।
अरब टाईम्सका अनुसार भने प्राईभेट सेक्टरलाई पनि सो अवधीमा सार्वजनिक विदा भनेर उल्लेख गरेको छ ।
