सुरज मास्के – हामी धेरै नेपालीहरु आफुले भने जस्तो नभए राम्रै कुराको पनि विरोध गरिरहन्छौं अनि कतिले नबुझेरै, कतिले बुझ पचाएर यस्ता कुराहरु शेयर गरिरहेका हुन्छौं । हिँजो आज फेसबुक तिर एउटा पोष्ट भाइरल भइरहेको छ, गैर आवासीय नेपाली संघको बारेमा । एक सचेत नागरिक अझ भनौं खाडीको रोजगारीको भरमा जवानीको खुशी बेचेर बुढेसकालको खुशी खरिद गर्ने व्यक्ति भएकोले यसबारे केहि कुरा लेख्न मन लागेको हो । पोष्टका कमेन्ट पढ्दै जाँदा आधालै पुरै सत्य र आधाले पुरै असत्य भन्नु पनि दुवै तर्फको अन्धो भक्त देखेर झनै उदेक लाग्छ । उक्त पोष्टमा लेखे जस्तोे पुरै सत्य नभएता पनि केहि हद सम्म सत्यता भने छ । समस्याहरु देखाइएका छन्, जुनसुकै कारणले यो पोष्टको शुरुवात भएता पनि यो पोष्ट शुरु गर्नेलाई भने धन्यवाद दिनै पर्छ । तर अझ पनि हामी समस्या मात्रै देखाउने हो र त्यसको समाधानको लागि अग्रसर नहुने हो भने यस प्रकारको भनाइ समाजलाई घातक हुन सक्छ ।
हामी सधै समस्या खोज्नमै तल्लिन भइरहेका छौं, अनि त्यो समस्याका बारेमा दोषारोपण गर्नमा कत्ति पनि हिचकिचाउदैनौं । यदि हामी आफु स्वयं या भावी पुस्ताको व्यवस्थित र खुशी समय चाहन्छौं भने समस्याका साथमा समाधन पनि खोज्ने बानी बसाल्न अबेर गर्नु हुदैन । यदि यसो गर्न सकेनौं भने विभिन्न संघ संस्थाको पदाधिकारीको हैसियतमा ड्यासमा उभिएर बोल्नु या सुनौलो भविश्यको कुरा गर्नु, सुसंस्कारका कुरा गर्नु, अरुलाई उल्लु बनाउनु मात्र हो । यस कुराले धेरैको चित्त दुखाउला तर पनि २१ औं शताव्दीको युवा सोंच या पोजिटिभ लिएर हेरौं । गैर आवसीय नेपाली संघ सबैको साझा संस्था हो भनेर हामी सबै भन्छौं तर साझा रुपमा काम किन गर्दैनौं । यदी यस संघलाई सहि तवरले अघि बढाउने हो भने तपाइ हामीले नै बनाउने हो । समग्रमा भन्दा यस संघको नेतृत्वमा धेरै कुरा भएको छ खाडी तथा मलेसिया वासीको लागि । हाम्रो आवाज सरकार सम्म पुर्याउन धेरै मद्धत पुगेको छ भने विभिन्न दैवि प्रकोप परेको बेला पनि राम्रो सहयोग जुटाएर पीडितहरुलाइ उपलब्ध गराइरहेको छ ।
सामुहिक लागानीको अवधारणा अघि बढाएर सबैबाट सानो सानो लगानी समेट्दै भविश्य सुनिश्चित गर्ने बाटो देखाउदै देश समृद्ध बनाउने तर्फ पनि अग्रसर भएको छ । सबै व्यक्ति वा संस्था आफैंमा पूर्ण हुदैन हुनै सक्दैन, यस संघका कार्यकर्ताबाट पनि गल्ति हुँदै नभएका भने होइनन् । तर गल्ति देखाउन मात्र भन्दा पनि त्यो गल्ति सुधार गर्ने तरिका या समाधानको पनि सुझाव दिनु पर्छ । यो संघ हाम्रै घर हो, हाम्रो घर राम्रो र सुन्दर बनाउने जिम्मेवारी पनि हाम्रै हो । विशेष गरि हाम्रो पहुच भनेको आफु कार्यरत देशको सम्मनवय परिषद हो र हामीले प्राप्त गर्नुपर्ने जानाकारी पनि राष्ट्रिय सम्मन्वय परिषदले नै प्रदान गर्नु पर्ने परिषदको दायित्व हो । यसका साथै सम्बन्धित देशमा नेपालीहरुको अवस्थाको बारेमा पनि परिषदले नै आइसीसीलाई र दुतावास एवं सम्बन्धित मन्त्रालयलाइ जानाकारी गराउनु प्रमुख दायित्व हो ।
म स्वयं पनि हाल कुवेतमा कार्यरत भएकोले कुवेतकै बारेमा पनि केहि शव्द खर्चिनै पर्ने मेरो दायित्व हो । हुन त मेरो लामो वसाई कुवेतमा भएको छैन भर्खर ३ वर्षको हाराहरी मात्र भएको छ । तर पनि एनआरएनए प्रतिको मेरो मोह भने निकै लामो रहेको छ र सकेको गर्न सधै नै तत्पर छू । त्यसैले पनि मैले नजिकबाट कुवेत एनआरएनएको गतिविधि नियालेको छु । विगत दुइ वर्षमा यस संघले निकै नै आरोह अवरोह तय गर्यो । यस संघलाई परेको अफ्ठ्यारोले सवै पक्ष दुःखी भयो र कसैलाइ पनि फाइदा पुगेन । विशेष गरि कुवेतमा पीडित नेपालीहरुले धेरै नै घाटा ब्यहोर्नु पर्यो । हुन सक्छ एनआरएनए कुवेत करिब ४ महिना निस्कृय जस्तै रहँदा सिमित व्यक्तिहरुलाइ फाइदा भयो तर पनि ती सब क्षणीक मात्र थियो, हो । तर पनि यो फेरी जुरमुराएर उठ्ने प्रयास गरेकै हो यसलाइ कसैले नकार्न मिल्दैन। अब हामी सबै मिलेर यो संस्थालाई अरु सबल र नेतृत्वदायी बनाउन पर्छ । कुवेतको राष्ट्रिय सम्मन्वय परिषदलाई माथी उठाउनु त छंदैछ र यस संघलाई खाडी मैत्री कसरी बनाउने भन्ने भुमिकामा पनि हाम्रो ठुलोहात हुनु पर्छ । सामान्य पन्जिकृत सदस्य र अन्तर्राष्ट्रिय भेलामा अति कम उपस्थितिले यो हुन सक्दैन । त्यसैले धेरे भन्दा धेरै पन्जिकृत सदस्य हुन पहिलो काम हो । यसको लागि https://mero.nrna.org मा गएर सदस्य बन्न सकिन्छ । जागरुक सदस्य र सवल नेतृत्व ले नै सबल संघ बन्न सक्छ । नेपाल सरकारले कानुन बनाइ दर्ता गरेको यो संघ भनेको श्रमिकहरुद्वारा श्रमिकहरुकै लागि काम गर्ने संस्था हो । त्यसैले पनि यो संस्थाको सदस्यको रुपमा जोडीएर ८० देशका नेपालीहरुसंग सहकार्य गर्ने अवसर नगुमाउँ र आफु आवद्ध भएर अरूलाइ पनि यस संघमा आवद्ध हुन अभिप्रेरित गराैं ।
