रञ्जिता भट्टराई – सिरहाको लहान स्थित नेपाल लाईफ इन्स्योरेन्समा जम्मा गरेको रकम पटक पटक ऋण लिएको भन्दै सिरहाको लहान नगरपालिका १ का दिनेश साह र उनकी श्रीमती सैनुनादेवी साहको बीमित रकम कम्पनीका कर्मचारीहरुले चलाएको खुलासा भएको छ । जहाँ साह दम्पतीले आफुहरुले बीमा गरेको रकम ऋण तथा कुनै प्रयोजनमा ननिकालिएको मौखिक उजुरी ईलाका प्रहरी कार्यालय लहानमा दिएपछि यो घटना सार्वजनिक भएको छ ।
नेपाल लाइफ इन्स्योरेन्स कम्पनीको जीवन सहारा र जीवन ज्योति बीमा लगायत विभिन्न पलोसीमा दस वर्षदेखि ५३ लाख रुपैयाँको बीमा साह दम्पतीले गराएका थिए । साह दम्पतीका ऐजेन्टको रुपमा नथुनी साह र लहान स्थिति कम्पनीका शाखा लेखापाल अनिल साहको मिलोमतोमा पटक पटक रकम निकालिएको सार्वजनिक भएपछि ठगी भएको भन्दै ईलाका प्रहरी कार्यालयमा साह दम्पतीले मौखिक उजुरी गरेका थिए ।
कम्पनीको नाम बद्नाम हुने भएपछि लाईफ इन्स्योरेन्सपक्ष, ऐजेन्ट नथुनी साह र लेखापाल अनिल साहलगायत कम्पनीका उच्च पदधिकारीहरुले असोजमसान्त भित्र निकालिएको रकम व्यवस्थापन गरी मलाई उपलब्ध गराउँने भएपछि सम्झौता भएको पीडित दिनेश साहले बताए । उता, लेखापाल अनिल साह नेपाल लाईफ इन्स्योरेन्स छाडेर सिटिजन लाईफ इन्स्योरेन्स लहानमा काम गर्न थालेको छ ।
पीडित साह दम्पतीले आफ्नो बीमित रकम पाउँनको लागि कम्पनीमा दूई सत्ता पहिले निवेदन दिएपनि उनीहरुको कुरा नसुनेपछि प्रहरीमा उजुरी गरेका थिए । चारैतीर न्यायको लागि ढोका ढकढकाउँन थालेपछि लाईफ इन्स्योरेन्सको ठगीवारे समाचार आएपछि पीडित साहलाई तीन दिन अगाडि मात्रै बीमित रकम फिर्ता गर्ने सम्झौता गरिएको छ ।
दिनेश साहको नाममा रु ३१ लाख ९७ हजार २९७ र सैनुनादेवी साहको नाममा रु २१ लाख ६८ हजार ८४० गरी जम्मा रु ५३ लाख ६६ हजार १३७ रुपैयाँ इन्स्योरेन्समा जम्मा गरेका थिए । तर दुबै जनाको नाममा जम्मा रहेको बीमा रकमबाट पाँच वर्षदेखि विभिन्न गते मितिमा पटक– पटक गरी २१ लाख ३० हजार ऋण निकालि सकेको छ । जसको ब्याज रु १० लाख ८१ हजार ३२५ भइसकेको छ । ऋण र ब्याज गरी उनको नाममा रु ३२ लाख ११ हजार ३ सय २५ रुपैयाँ बनेको छ ।
पीडित दिनेशले घरायसी समस्याको लागि फाइल बोकेर ऋण लिन अफिस पुगेपछि ऋण निकालेको थाहा पाएपछि उनी आश्यर्चकित भएका छन् । पाँच वर्षदेखि पटक–पटक आफ्नो नाममा ऋण निकाल्दा पनि कम्पनीले थाहा नपाउनुले ऐजेन्ट र लेखापालमाथी छानविन थालेपछि यो घटना सार्वजनिक भएको छ । पीडित साहले भने अरु बेला मोबाइलमा म्यासेज र खबर आउँथ्यो तर ऋण निकाल्दा किन एसएमएस आएन ? उनको प्रश्न छ ।
लाईफ इन्स्योरेन्स कम्पनीका कार्यकारी प्रमुख सुशिल चौधरीसँग सम्पर्क गर्दा ‘यो केही होईन् ।’ ‘पीडितले पैसा पाउँने निश्चित छ । ’‘लेखापाल अनिल साह हाम्रो कम्पनी छाडिसकेका छन् ।’ ‘हामीसँग पीडित साहसँग सबै कुरा भइसकेको छ ।’ यत्ति भन्दै उनले फोन काटे ।
