तितोपाटी – नेपाल कम्युनिष्ट पार्टीको (नेकपा) ले विजया दशमी, दीपावली, नेपाल सम्वत् र छठका अवसरमा आगामी शनिबार चियापान कार्यक्रम गर्ने भएको छ भने चियापान कार्यक्रमको सम्पुर्ण तयारी पुरा भएको जनाएको छ । पार्टी एकता पश्चात पहिलो पटक हुन गइरहेको चियापान कार्यक्रममा उपस्थितिको लागि ५० हजारलार्इ निम्तो गरिएको बुझिएको छ । चियापान कार्यक्रम दिउँसो १२ बजेदेखि ५ बजेसम्म हुनेछ । गत वर्ष सङ्घ र प्रदेशको निर्वाचनको कारणले चियापानको आयोजना गरिएको थिएन ।
पार्टी एकतापछि पहिलो पटक विजया दशमी, दीपावली, नेपाल सम्वत् र छठका अवसरमा हुन गइरहेको चियापान कार्यक्रम भृकुटीमण्डपस्थित बगैँचामा हुन लागेको हो । यसअघि पार्टी एकता हुनुभन्दा अघि नेकपा (एमाले) र नेकपा (माओवादी केन्द्र) ले छुट्टाछुट्टै चियापान कार्यक्रम गर्ने गरेका थिए । यस पटकको चियापान कार्यक्रमको संयोजक पार्टी महासचिव बिष्णु पाैडेल रहेका छन् ।
चियापान समारोहमा दिउँसो १२ देखि ३ बजेसम्म पार्टीका कार्यकर्ता र सर्वसाधारण र दिउँसो ३ बजेदेखि ५ बजेसम्म विशिष्ट अतिथिको लागि समय छुट्टाइएको बुझिएको छ । दिउँसो ३ बजेदेखि नेपालस्थित विदेशी कूटनीतिज्ञ, राजनीतिक दलका नेता, संवैधानिक अङ्गका पदाधिकारी सहभागी हुने छन् । चियापान कार्यक्रमलाई व्यवस्थित बनाउनका लागि ३०० स्वयम्सेवक परिचालन गरिने छ ।
