गजल
संस्कृति भन्दा विकृति छायो, तिजको रहरमा ।
तडक भडक धेरै नै भयो , गाउँ टोल शहरमा ।।
हुने खानेको घरमा मात्रै,चाड आए जस्तो भयो
खै के तिज आउला र कठै ,झुपडीको कहरमा ।।
लुगा अनि गहनामा, देखासिखी बढ्यो कतै
कतै आङ ढाक्ने चिन्ता, हुन्छ हरेक प्रहरमा ।।
दरको नाममा प्रयोग भए,व्हिस्की अनि बियर
लागेको छ मन सबैको ,अमृत छोडी जहरमा ।।
घर घरमा खर्च बढ्यो, यस्तै यस्तै विकृतिले
फजुल खर्च भइ बग्यो, धन सम्पत्ति नहरमा ।।
जोगाइ राखौँ संस्कृति हाम्रो,भोलीका पिंढीलाई
बिकृति फालौं चेतना फैलाइ,आम जनलहरमा ।।
कमला न्याैपाने, झापा
हाल – भक्तपुर
