तितोपाटी – फिल्म ‘गुनगुन’ को ट्रेलर सार्वजनिक भएको छ । राजधानीमा मंगलबार एक कार्यक्रमका बीच ट्रेलर सार्वजनिक भएको हो। तीन दशकदेखि अभिनयमा सक्रिय कलाकार पुकार भट्टराईको निर्माण तथा निर्देशन रहेको फिल्मको ट्रेलर शीर्ष पात्र सञ्चिता लुँइटेल वरपर घुमेको छ। निर्देशक भट्टराईले फिल्मले सामाजिक कथा बोकेकाले दर्शकले मनपराउने दाबी गरे । ‘कथा सामाजिक नै हो। प्रस्तुतिमा केहि भिन्नता ल्याउने कोसिस गरेको छु,’ उनले भने,‘फिल्म एक्सन धारमा बनेको छ। कथासँगै एक्सन रुचाउने दर्शकले फिल्म मनपराउनुहुनेछ।’
फिल्मका कलाकार सुवास मेचेले फिल्ममा मेहनत गरिएकाले दर्शकका लागि मनोरञ्जनपूर्ण रहेको दाबी गरे। ‘फिल्मले हाम्रै समाजको कथालाई चित्रण गरेको छ। त्यसकारण पनि फिल्म दर्शकका लागि विशेष छ,’मेचेले भने।
प्राथना फिल्म्सको व्यानरमा निर्माण भएको फिल्ममा सञ्चिता लुइँटेल, रविन्द्रप्रताप सेन, सुवास मेचे, नविन श्रेष्ठ, गणेश जिसी, देशभक्त खनाल, अनु भण्डारी, सुमेश श्रेष्ठ, राधा दाहाल, भिम मैनाली, बालदिप राई, विपिन प्रसाई र निर्देशक भट्टराईको अभिनय छ । फिल्ममा हिमाल केसीको द्वन्द्व, अर्जुन जिसीको सम्पादन र सौरभ लामाको छायांकन छ । फिल्म आगामी कार्तिक ३० गते रिलिज हुँदैछ।
