पृथ्वीको गर्भमा अक्सिजनको विशाल भण्डार फेला, जीवनको उत्पत्तिबारे नयाँ संकेत

वैज्ञानिकहरूले पृथ्वीको गहिरो भागमा रहेको पग्लिएको चट्टान (म्याग्मा) भित्र ठूलो मात्रामा अक्सिजन लुकेको हुन सक्ने नयाँ तथ्य पत्ता लगाएका छन्। डा. यानहाओ लिन र डा. हो-क्वाङ माओ नेतृत्वको अनुसन्धानले पृथ्वीको भित्री भागले पहिले अनुमान गरिएभन्दा धेरै अक्सिजन भण्डारण गर्न सक्ने देखाएको छ।

अनुसन्धानका क्रममा वैज्ञानिकहरूले प्रयोगशालामा पृथ्वीको गर्भजस्तै अत्यधिक तापक्रम र दबाब सिर्जना गरेर परीक्षण गरेका थिए। परीक्षणबाट म्याग्माले आफ्नो सामान्य रासायनिक संरचनाभन्दा बाहिर गएर पनि अतिरिक्त अक्सिजन सोसेर राख्न सक्ने पत्ता लागेको हो।

वैज्ञानिकहरूका अनुसार पृथ्वीको भित्री भागमा लामो समयसम्म अक्सिजन जम्मा भएर बसेको हुन सक्छ। जब ज्वालामुखी विस्फोट हुन्छ, त्यही अक्सिजन सतहतर्फ आएर वायुमण्डलमा मिसिन सक्छ। यसले पृथ्वीमा अक्सिजनयुक्त वातावरण कसरी विकसित भयो भन्ने रहस्य बुझ्न मद्दत पुग्ने अपेक्षा गरिएको छ।

अनुसन्धानले करिब २ अर्ब ५० करोड वर्षअघि पृथ्वीमा भएको ‘ग्रेट अक्सिडेसन इभेन्ट’ अर्थात् अक्सिजनको मात्रा अचानक बढेको घटनालाई पनि नयाँ दृष्टिकोणबाट व्याख्या गर्न सक्ने संकेत दिएको छ।

वैज्ञानिकहरूको प्रारम्भिक अनुमान अनुसार, प्राचीन ज्वालामुखीहरूबाट निस्किएको म्याग्माले आफ्नो तौलको सानो अंश मात्रै अक्सिजनका रूपमा बाहिर फालेको भए पनि त्यसको मात्रा आजको वायुमण्डलमा रहेको अक्सिजन बराबर हुन सक्थ्यो।

https://www-sciencedaily-com.translate.goog/releases/2026/10/261027063702.htm?_x_tr_sch=http&_x_tr_sl=en&_x_tr_tl=hi&_x_tr_hl=hi&_x_tr_pto=sge