ब्राजिलमा राष्ट्रपति पदका लागि भएको दोस्रो चरणको निर्वाचनमा वामपन्थी वर्तमान राष्ट्रपति लुइज इनासियो लुला दा सिल्भा र दक्षिणपन्थी उम्मेदवार फ्लाभियो बोल्सोनारोबीच कडा प्रतिस्पर्धा देखिएको छ।
मतदान केन्द्रसम्म पुग्न यातायात समस्या र केही क्षेत्रमा परेको भारी वर्षाका कारण दुवै उम्मेदवारले मतदान समय दुई घण्टा थप्न आग्रह गरेका थिए। त्यसपछि सर्वोच्च अदालतले मतदान समय बेलुका ७ बजेसम्म विस्तार गर्ने आदेश दिएको छ। निर्णयपछि निर्वाचन अधिकारीहरूले मतगणना प्रक्रिया पनि अस्थायी रूपमा रोकेका छन्।
अक्टोबर ४ मा भएको पहिलो चरणको मतदानमा फ्लाभियो बोल्सोनारोले ४७ प्रतिशत मत प्राप्त गरेका थिए भने लुलाले ४५ प्रतिशत मत पाएका थिए। त्यसपछि लुला चुनावी दौडमा पछाडि परेको विश्लेषण गरिएको थियो।
चुनावअघि दुवै पक्षबीच चर्को आरोप–प्रत्यारोप भएको थियो। लुलाले आफूलाई अन्तिमपटक देशको नेतृत्व गर्न चाहेको बताएका छन् भने बोल्सोनारोले निर्वाचित भएमा आफ्ना पिता तथा पूर्वराष्ट्रपति जैर बोल्सोनारोलाई माफी दिने घोषणा गरेका छन्।
राजनीतिक विश्लेषकहरूका अनुसार यो निर्वाचनको परिणामले ब्राजिल मात्र नभई समग्र ल्याटिन अमेरिकी राजनीतिमा पनि महत्वपूर्ण प्रभाव पार्न सक्छ। ब्राजिल क्षेत्रकै सबैभन्दा ठूलो अर्थतन्त्र र सबैभन्दा बढी जनसंख्या भएको देश हो।
