इम्फाल: भारतको मणिपुर राज्यस्थित नोनी जिल्लामा बुधबार बिहान सुरक्षा बल र नागा भिलेज गार्डबीच भएको गोली हानाहानमा एक जना नागा भिलेज गार्डको मृत्यु भएको छ भने अन्य चार जना घाइते भएका छन्। घाइतेमध्ये Central Reserve Police Force (सीआरपीएफ) का दुई जवान पनि रहेका बताइएको छ।
घटनापछि Manipur Joint Tribes Council (एमजेटीसी) को कार्यसमितिले नागा समुदायको बाहुल्य रहेका क्षेत्रमा तत्काल प्रभावबाट अनिश्चितकालीन बन्द (शटडाउन) घोषणा गरेको छ।
नोनी जिल्लाकी प्रहरी प्रमुख (एसपी) दिव्या तंवरले गोली हानाहान भएको पुष्टि गर्दै सुरक्षा अभियान सञ्चालनका क्रममा घटना भएको बताएकी छन्। उनले मृतक र घाइतेको संख्या तथा घटनाको सम्पूर्ण विवरण अझै आधिकारिक रूपमा संकलन भइरहेको जानकारी दिएकी छन्।
प्राप्त जानकारीअनुसार, बुधबार बिहान करिब ८ बजे नोनी जिल्लाको बिटियाङ गाउँमा Commando Battalion for Resolute Action (CoBRA) (कोब्रा कमान्डो) र सीआरपीएफका जवानले नागा भिलेज गार्ड्सको एक शिविरमा संयुक्त सुरक्षा अभियान सञ्चालन गरेका थिए। सोही क्रममा दुवै पक्षबीच गोली हानाहान भएको बताइएको छ।
गोली लागेर २२ वर्षीय लियानबिलुङ लियाङमाईको घटनास्थलमै मृत्यु भएको छ। उनी नोनी बजार निवासी काजिरङ्गा लियाङमाईका छोरा हुन्। यसका साथै अन्य दुई जना नागा भिलेज गार्ड पनि घाइते भएका छन्।
भारतीय सञ्चारमाध्यमहरूका अनुसार, गोली हानाहानमा सीआरपीएफको १८६औँ बटालियनका हेड कन्स्टेबल राधेश्याम र कन्स्टेबल जितेन्द्र कुमार पनि घाइते भएका छन्।
घटनापछि एमजेटीसीले केन्द्र सरकारले घटनाका जिम्मेवारमाथि “ठोस र प्रभावकारी कारबाही” नगरेसम्म बन्द जारी रहने चेतावनी दिएको छ। साथै, नागा बाहुल्य क्षेत्रमा राष्ट्रिय राजमार्ग, रेल सेवा तथा राष्ट्रिय महत्वका विकास आयोजनाहरू पनि बन्द राख्न आह्वान गरेको छ।
यस घटनापछि प्रभावित क्षेत्रमा सुरक्षा व्यवस्था कडा पारिएको छ भने थप सुरक्षा बल परिचालन गरिएको छ। स्थानीय प्रशासनले सर्वसाधारणलाई शान्त रहन र अपुष्ट सूचना वा अफवाहमा विश्वास नगर्न आग्रह गरेको छ।
