माटोको ढिस्कोले पुरिएर कैलालीमा तीन जना युवतीको ज्यान गएको छ भने दुई जना घाइते भएका छन् ।कैलालीको जानकी गाउँपालिका–९ पूर्वी खैरीफाँटामा माटोको ढिस्कोले पुरिएर तीन जनाको मृत्यु भएको इलाका प्रहरी कार्यालय टीकापुरले जानकारी दिएको छ ।
घर लिपपोत गर्ने माटो लिन गएका १७ वर्षीया धनसरी विक, २० वर्षीया भावना ओड र ३१ वर्षीया गंगा जैगडीको ढिस्कोले परेर मृत्यु भएको इलाका प्रहरी कार्यालय टीकापुरका डिएसपी मधुसुदन न्यौपानेले जानकारी दिए । ढिस्कोमा पुरिँदा स्थानीय काजल विक र अञ्जु जैगढी घाइते भएका छन् । उनीहरुको टीकापुर अस्पतालमा उपचार भइरहेको छ ।
उनीहरु घर लिपपोतका लागि माटो लिन गाउँ नजिकैको जंगलमा गएका थिए । माटो खन्ने क्रममा खसेको ढिस्कोले पाँचै जना पुरिएको डिएसपी न्यौपानेले बताएका छन् । उनीहरुमध्ये तीन जनाको घटनास्थलमै मृत्यु भएको हो । माटोको ढिस्कोले पुरिएको खबर पाएपछि स्थानीयवासी र प्रहरीले उद्धार गरेको हो ।
-नयाँपेजबाट
