सालका पात छानी छानी टपरी खुटिन्छ यहाँ ।
चिल्ला-चिल्ला जोडिन्छ खस्रा छुटिन्छ यहाँ ।।
धेरै बन्छन् जिन्दगीमा सपनाका घरहरू
वाध्यताको ज्वाला भित्र रहर भुटिन्छ यहाँ ।
टुकी बाली अनिदोमा मेहनतले कमाएको
प्रमाणपत्र लुटेराको हातबाट लुटिन्छ यहाँ ।
लक्ष्य थियो हिमालको शिखर चुम्ने अझै
विचरा!बिचमा आइ कसैद्वारा टुटिन्छ यहाँ ।
मुर्खहरूले खेती गर्ने जिम्मा लिए पछि
हलो आफै अड्काएर गोरू चुटिन्छ यहाँ ।
-शोभा कडरिया, कोईराला
माथागढी-२, रूप्से
पाल्पा, नेपाल ।
