कमिला ताँती
लोकको प्यारो छन्द झ्याउरे
***************
आउनुस साथी मिलेर बसौँ झगडा नगरी ।
समुह हाम्रो हुनेछ राम्रो कमिला जसरी । १ ।
कमिला ताँती मिलेर हात्ती बेसरी तान्दछ ।
माहुरी हुल मिलेर सङ्गै समुह बन्दछ । २ ।
एकले थुक्दा बिलाई जान्छ सयले नदी नै ।
मिलेर गर्दा जे पनि सफल फाइदा अति नै । ३ ।
अर्काको दोष नखोज्दा जाती गुणको कदर ।
गरेको राम्रो आफूको जस्तै अरुको आदर । ४ ।
अरुले माथि उचालिदिए हलुका बनिन्छ ।
आफूले आफै उचाल्न खोज्दा मुटु नै पिरिन्छ । ५ ।
को छ र यहाँ रामको सरी दोष नै नभाको ।
कसरी आयौँ कहाँ हो जाने कसले चाल पाको । ६ ।
हिजोको कुरा भुलेर हामी “आज” मा रमाउँ ।
भबिष्य पनि बशमा छैन यो कुरा चाल पाउँ । ७ ।
हरि शर्मा (सुबेदी)
गलकोट- नुवाकोट, बाग्लुङ, नेपाल
हाल: मिसिगन अमेरिका
