भोटेकोशी बाढीमा ज्यान गुमाएका तथा बेपत्ता भएका प्रहरी कर्मचारीका परिवारलाई नेपाल प्रहरीले विशेष राहत दिने निर्णय गरेको छ। प्रहरी प्रधान कार्यालयको बैठकले पीडित परिवारलाई १० लाख रुपैयाँ आर्थिक सहायता, प्रहरी कल्याण कोषबाट लिएको ऋण मिनाहा तथा सन्तानलाई निःशुल्क शिक्षा उपलब्ध गराउने निर्णय गरेको हो।
साथै, परिवारका इच्छुक एक सदस्यलाई सीपमूलक तालिम प्रदान गरिनेछ। नेपाल प्रहरीले प्रधानमन्त्री दैवी प्रकोप उद्धार कोषमा ४० करोड रुपैयाँ सहयोग गर्ने निर्णय पनि गरेको छ।
भोटेकोशी बाढीमा हालसम्म २५ जना प्रहरी कर्मचारी सम्पर्कविहीन छन्। उनीहरूको खोजीका लागि विशेषज्ञ टोली परिचालन गरिने प्रहरीले जनाएको छ।
