अहिले चरम गर्मीको समय छ । गर्मीको कारण हामीलाइ खाना नरूच्ने, माछा मासुजस्ता गरिष्ठ खानपानले स्वास्थ्य गडबडी हुने तथा पाचन सम्बन्धी समस्या हुने गर्छ । शरीरमा पानीको मात्रा कम भएर शरीरमा जलवियोजन समेत हुने गर्छ । यस्ता समस्याबाट छुटकारा पाउन, मुखमा स्वाद तथा भोक जगाउन फलफुल सेवन गर्नु पर्छ । गर्मी मौसममा स्ट्रबेरी, ब्लुबेरी, रास्पबेरी, आँप, मेवा, अनानास, आरु, चेरी, खरबुजा, तरबुजा, किवी, स्याउ, सुन्तला, कागती लगायतका फलफूल ताजा, स्वादिष्ट र पौष्टिक हुने भएकाले नियमित सेवन गर्नु स्वास्थ्यको लागि एकदमै लाभदायक मानिन्छ ।
यी फलफूलमा भिटामिन C, भिटामिन A, फाइबर, पोटासियम तथा एन्टिअक्सिडेन्ट प्रशस्त पाइने भएकाले रोग प्रतिरोधात्मक क्षमता बढाउने, पाचन प्रणाली सुधार्ने, शरीरलाई हाइड्रेट राख्ने तथा मुटु र छालाको स्वास्थ्यमा फाइदा पुग्ने हुँदा गर्मी सिजनमा यस्ता फलफुल प्रशस्त मात्रामा सेवन गर्नु पर्छ ।
विशेषगरी तरबुजा, खरबुजा, स्ट्रबेरी, आरु र अनानास गर्मीयाममा शरीरलाई पानीको कमी हुन नदिन उपयोगी मानिन्छन्। फलफूललाई स्मुदी, सलाद, जुस, दही तथा स्वस्थ खाजाका रूपमा सेवन गर्न पनि सकिन्छ । त्यसै गरि चुकुन्दर, गाजर, केरा जस्ता फलफुलको मिश्रण गरि जुस बनाएर पिउँदा यस्ता फलफुलमा अाइरन तत्वको मात्रा बढि हुने भएकोले रक्त अल्पता हुनबाट समेत जोगाउँछ ।
यद्यपी, फलफूल स्वस्थ आहारको महत्वपूर्ण हिस्सा भए पनि सन्तुलित मात्रामा सेवन गर्न र एलर्जीको समस्या देखिएमा भने चिकित्सकको सल्लाह अनुसार सेवन गर्नु पर्छ ।
