बङ्गलादेशको अन्तरिम सरकारले अपदस्थ प्रधानमन्त्री शेख हसिनालाई देशमा फर्काउन भारतलाई कूटनीतिक नोट पठाएको छ । बङ्गलादेशका विदेश मामिला सल्लाहकार तौहीद हुसैनले सोमबार आफ्नो कार्यालयमा यसको जानकारी दिएका हुन् ।
ढाकास्थित अन्तर्राष्ट्रिय अपराध न्यायाधिकरण (आईसीटी) ले हसिना र उनको कार्यकालका विभिन्न मन्त्री, सल्लाहकार, सैन्य अधिकारीलाई ‘मानवता र नरसंहारविरुद्धको अपराध’ को मुद्दामा पक्राउ पुर्जी जारी गरिसकेको छ ।
आफ्नो कार्यालयले भारतबाट हसिनाको सुपुर्दगीमा सहजीकरण गर्न भारतीय परराष्ट्र मन्त्रालयलाई पत्र पठाएको सोमबारै गृह सल्लाहकार जहाँगिर आलमले बताएका थिए । प्रक्रिया अझै जारी रहेको बताइएको छ । ढाका र नयाँ दिल्लीबिच पहिलेदेखि नै सुपुर्दगी सन्धि छ । उक्त सन्धि अन्तर्गत हसिनालाई बङ्गलादेश फर्काउन सकिने उनले बताए ।
