नेपाल एयरलाइन्सको जहाजबाट गएराति कतारको दोहा जान लागेका यात्रुहरुलाई जहाजका सबै सिट भरिएको भन्दै त्रिभुवन अन्तर्राष्ट्रिय विमानस्थलबाटै फर्काइएको छ ।गएराति ११ बजेको उडानका लागि टिकट काटेर एयरपोर्ट पुगिसकेका यात्रुहरुलाई जहाज प्याक भइसकेको भन्दै फर्काइएपछि आक्रोशित यात्रुहरु विरोध जनाउन नागरिक उड्डयन प्राधिकरणको कार्यालय पुगेका छन् ।
एकजना यात्रु लक्ष्मीप्रसाद दाहालले भने, ‘टिकट हाम्रो हातमा छ तर जहाजका सबै सिट प्याक भयो, अब तपाईंहरुको फ्लाइट पर्सि हुन्छ भनेर हामीलाई फर्काइयो ।’ आफूसहित करिब ६० जना यात्रुहरुलाई फर्काइएको दाहाल बताउँछन् । उनीहरुलाई एयरलाइन्सले सुन्धाराका होटलहरुमा लगेर राखेको छ ।
उनका अनुसार गएराति ११ बजेको उडानका लागि राति ८ बजे नै एयरपोर्ट पुग्दा नेपाल एयरलाइन्सको काउन्टर क्लोज भइसकेको थियो । त्यहाँका कर्मचारीहरुले सिट फूल भइसकेको भन्दै यात्रुहरुलाई होटलमा लगेको दाहालले बताए । नेपाल एयरलाइन्सले लापरवाही गरेर यात्रुहरुलाई अलपत्र पारेको भन्दै उनले विरोध जनाए । लापरवाही गर्नेहरुलाई कारबाहीको माग गर्दै यात्रुहरु सुन्धाराको होटलबाट नागरिक उड्डयन प्राधिकरणको कार्यालय बबरमहलमा पुगेका छन् ।
नेपाल एयरलाइन्सकी प्रवक्ता अर्चना खड्काले केही दिन अगाडिको ठूलो जहाजमा भएका यात्रुहरुलाई प्राविधिक कारणले सानो जहाजमा सार्नु परेकाले यात्रुहरुको व्यवस्थापन गर्दा केही यात्रुहरुलाई गएराति उडाउन नसकिएको बताइन् । ‘त्यो दिन करिब १०० जना यात्रुहरुलाई पठाउन सकेनौं, सबै यात्रुहरुको व्यवस्थापन गर्दै गइरहेका छौं । हिजोको कुरा त्यही हो,’ खड्काले भनिन्, ‘हामी कसैलाई पनि अलपत्र पार्दैनौं, अर्को फ्लाइटमा पठाउँछौं ।’
-अनलाइन खबरबाट
