तीतोपाटी – स्पेस एक्समार्फत ४ जना पर्यटक अन्तरिक्ष यात्रमा निस्किएका छन् । स्पेस एक्सको इन्सपिरेसन-४ मिसनअन्तर्गत अमेरिकाको फ्लोरिडास्थित केनेडी स्पेस सेन्टरबाट चारजनलाई अन्तरिक्ष यात्राका लागि बुधबार राति रकेटमार्फत पठाइएको हो । यस संगै प्रविधि व्यवसायी एलन मस्कको कम्पनी स्पेस एक्सले बुधबार ४ जनालाई अन्तरिक्ष पर्यटकको रुपमा अन्तरिक्षमा लगेसँगै अन्तरिक्ष पर्यटनको औपचारिक सुरुवात भएको हो ।
स्थानीय समय अनुसार बुधबार राति ८ बजे स्पेस एक्सको रकेटमार्फत उनीहरुलाई अन्तरिक्षमा पठाइएको हो । स्पेस एक्सको यान मार्फत अन्तरिक्ष यात्रामा गए पनि यसको खर्च भने ३८ वर्षिय अर्बपति जेरेड इज्याकम्यानले लगानी गरेका हुन् । यो मिसन पर्यटनका हिसाबले अन्तरिक्षमा उडान गरिएको स्पेस एक्सले जनाएको छ ।
ज्यारेड आइज्याकम्यानको खर्चमा शुरू भएको अन्तरिक्ष पर्यटनको यो मिसनमा २९ वर्षीया हेले अर्सेनियूस, ५१ वर्षीया सियान प्रोक्टर र ४२ वर्षीय क्रिस सेमब्रोस्की सामेल छन् ।
अर्सेनियूस हेलेले बाल अवस्थामा क्यान्सरलाई जितेकी हुन् । उनी हाल सेन्ट ज्युड अस्पतालमा फिजिसियनका रूपमा कार्यरत छिन् । उनी इजाकम्यानको अनुरोधमा यो यात्रामा सहभागी भएकी हुन् ।
दोस्रो यात्री ५१ वर्षकी डाक्टर सायन प्रोक्टर भूगर्भ वैज्ञानिक र विज्ञान सञ्चारविज्ञ हुन्। उनी एक सामुदायिक क्याम्पसमा पनि पढाउँछिन् । प्रोक्टरले सामाजिक सञ्जालमार्फत अन्तरिक्ष यात्राका लागि अवसर पाएकी हुन् ।
तेस्रो यात्री क्रिश सम्ब्रोस्की ४२ वर्षका अमेरिकी एअर फोर्सका अवकाशप्राप्त अधिकारी हुन्। उनी एरोस्पेस कम्पनी लकहेड मार्टिनमा काम गर्छन्।
अन्तरिक्ष पर्यटनयात्रीले अन्तरिक्षमा ३ दिन बिताउनेछन् । स्पेस एक्सको ड्रागन क्याप्सुलमा रहेका उनीहरु पृथ्वीदेखि ५६३ किलोमिटरको उचाइमा पुग्ने छन् । यो उचाइ अन्तर्राष्ट्रिय अन्तरिक्ष केन्द्रभन्दा एक सय किलोमिटर माथि हो ।
यो तीन दिनको यात्राका क्रममा उनीहरुले हरेक ९० मिनेटमा पृथ्वीको एक फन्को लगाउँछन् । शनिबार उनीहरु पृथ्वीमा फर्कनेछन् । फ्लोरिडाको तटीय क्षेत्रमा अवतरण हुने सीएनएनले जनाएको छ ।
यो यात्रा अन्तरिक्ष पर्यटनका लागि विश्वका लागि नयाँ अभ्यास भएको बताइएको छ । यो मिसनको मूल्य करिब २०० मिलियन डलर खर्च हुने बताइएको छ । स्पेस एक्सको क्रियू ड्रागन क्याप्सुलको एक सिटको मूल्य ५५ मिलियन डलर लाग्छ ।
