प्रतिमा शिवाकोटीको गजल संग्रह भाग -१

हाँगा खस्ने डरले होकी, फेदै ढाल्छ घाती हजुर ।
स्वचालित इमान उस्को, के दुख्ला र छाती हजुर ।।

राज्य कोषको ढुकुटीमा, गर्नु गर्यो ब्रह्मलुट,
नाता गोता आसे पासे, लगाएर ताँती हजुर ।।

यो देशको विकास अनि समृद्दिको कुरा गर्थ्यो,
चिचीपापा चाखेपछि, राख्यो काम थाँती हजुर ।।

स्वार्थ, लोभ, घमण्ड र निरंकुशताले भरिएको,
यी अधर्मी कस्का होलान्, कठै छोरा नाती हजुर ।।

जुनै जोगी आए पनि, कानै चिरे जस्तो भयो,
यस्तो लाग्छ राजतन्त्र नै थियो कि त जाती हजुर ।।

-प्रतिमा शिवाकोटी
कालिन्चोक गा.पा. – ८ सुनखानी, दोलखा ।