तितोपाटी- मिलेन पटक्कै कुनै गति! सारै बिमेल वा असङ्गति!
यही होला बिसङ्गति आहा!! कस्तो बिमेलका कुराहरु यो लोकमा!!!
एकातिर आफ्नो लभ पर्छ त सोही दिन सोही समयमा आफन्तको घरमा जुठो ! धर्म कमाउन मन्दिर पुग्ने भक्त सुटुक्क कसैको जुत्ता चोरी गायब ! तामा तुलसी छोएर कसम खाएको नेता दुनो सोझ्यायो आफ्नै! शिक्षकले दिनभर पढायो अनि सोही छात्रालाई राति प्रेमिका बनायो !
सालीप्रति आसाक्ति देखाउनेहरु कालिका भक्त !
धरोधर्म भन्ने व्यापारी तोक्छ मन लागेको भाउ!
दिनभर श्राध्द गरेर हिँडेको ब्रम्हाण राति मस्त पिएर देखायो जात्रा!
घरमा श्रीमती छोराछोरी हुनेले वाहिर अविवाहित घोषणा!
सिउँदोमा राखेको सिन्दुर र हातमा लगाएको चुरा भुल्दै कुनै विवाहित महिलाको आफूलाई अविवाहित घोषणा !
आफ्नो परिवारको भलाईको लागि विदेश गएको लोग्ने घर फर्किँदा घरमा सम्पति तथा श्रीमती गायव !
यति मात्रै हो र ? कति छन् कति यस्ता बिसङ्गति !
यस्तै भएको कारणले होला नेपाली भाषाले उखान टुक्का जुराएको!
ताक परे तिवारी नत्र गोतामे!
मुखमा रामराम बगलीमा छुरा!
रोटी चिल्ला मिठा त कुरा खस्रा!
नक्कली जोगिले बढी खरानी घस्छ !
आधा गाग्रो छच्ल्किन्छ!
कुरा गर्दै जाँदा अर्को उखाने पुराण बन्दछ, छाडौं यस्ता कुरा!
काममा मात्र हो र ? नाममा पनि उस्तै हैरान!
दिनभर अर्काको जिउ काटेर मासु बेच्नेको नाम दयाराम!
खालि अर्काको बिगार्दै हिँड्ने र सुरा सुन्दरीमा दिनरात लट्ठ हुनेको नाम धर्मदेव! काम बिभिषण नाम चाहिं लक्ष्मण!
काम -कंश, रावण, मधु, कैटभ तर नाम चाहिँ राम!
कामवासना बोको जस्तो स्वभाव भएको ब्यक्तिको नाम भिष्म!
कानाको नाम नेत्र बहादुर!
नास्तिकको नाम इश्वर!
काँतर तथा पानी आन्द्रेको को नाम बीरबहादुर!
नाम छ हरि बहादुर, काम वृत्रासुर!
छुच्चा, मख्खिचुस, चिम्टा, चुईँया, कन्जुस, लोभी काट्टेहरुको नाम दानबहादुर!
वाह!!! क्या कमाल!!
रुन्चेहरुको नाम- खुशी, विनोद, राजु, प्रफुल्ल, मनोहर,मुस्कान, आदि आदि!! आफ्नै दुनो सदैव सोझ्याउनेहरुको नाम- दुर्गा, अच्युत, माधव, केशव, गोविन्द , दामोदर बिष्णु,शिव श्रीरामआदि !
छ्या!!!कस्तो ताजुव लाग्दा कुराहरु!
नारी नामहरु पनि उस्तै छ्न् ।
आँखा डेरो हुनेको नाम सुलोचना!
बेश्याको नाम सती, सावित्री, दुर्गा, देवी!
सबै कुरामा अशान्ति सृजना गर्नेको नाम शान्ति!
बाँदरमुखेको नाम सुन्दरी!
हिउँ जस्तो मुहार हुनेको नाम काली!
सुर्पणखा र हिडिम्वाको स्वभाव हुनेको नाम-
सीता, सरिता, शारदा, कमला, राधिका, सरला इन्दिरा, दीपिका, सरस्वति, देवी आदि आदि !
किन भएको यस्तो ?
छैन उत्तर! मात्र बिसङ्गति ।
समयको गतिसाथ कतै बिसङ्गति पनि हट्छ कि ? आशा भने पट्टकै मार्नु हुँदैन!
यस्ता नाम कति छन् कति!
हजुर हामी पनि आफ्नो नाम सम्झेर बिसङ्गति छुट्ट्याउन तिर लागिहाले राम्रो!
हरि शर्मा(गलकोटे कवि)
हाल: मिशिगन अमेरिका ।
