तितोपाटी – विदेशमा रहेका नेपालीको उद्धारका लागि भोलि मंगलबारबाट पुनः चार्टर उडान शुरू हुने भएको छ । यसअघि होटेल क्वारेटिनको व्यवस्थापन हुन नसकेको भन्दै कोभिड १९ संकट व्यवस्थापन केन्द्रको निर्देशनमा गत सोमबारबाट विदेशबाट नेपालीलाई ल्याउन रोक लगाइएको थियो ।
मंगलबारबाट लागू हुने गरी संस्कृति, पर्यटन तथा नागरिक उड्डयन मन्त्रालयले नयाँ तालिका तय गरेको छ । नयाँ तालिका अनुसार, विदेशी वायुसेवाले मंगलबारदेखि नै उद्धार उडान गर्दै छन् भने नेपाली वायुसेवा कम्पनीहरु हिमालय एयरलायन्स र नेपाल वायुसेवा निगमले बिहीबारदेखि उद्धार उडान थाल्ने छन् । नेपाल वायुसेवा निगमले रियाद, क्वालालम्पुर, दुबई, कतार र कुवेतबाट नेपाली नागरिकहरु उद्धार गर्न अनुमति पाएको छ भने हिमालय एयरलायन्सलाई दमाम, क्वाललम्पुर, आबुधाबी र दोहाका लागि उडान गर्न अनुमति पाएको छ ।
सरकारले १६ भदौबाट भने नियमित उडान गर्ने निर्णय गरिसकेको छ । त्यसअगाडी ८ दिनका लागि चार्टर उडान हुन लागेको हो । अब नेपाल आउने सबै यात्रुको अनिवार्य पीसीआर रिर्पोट हुनुपर्छ । पीसीआर नभएका यात्रु ल्याएमा उनीहरुलाई क्वारेन्टिनमा राखेको खर्च एयरलाइन्सले नै बेहोर्नुपर्छ ।
नेपाल आइसकेपछि पीसीआर रिपोर्ट नेगेटिभ भएकाहरूले होटल क्वारेन्टाइनमा बस्नु पर्ने छैन भने बाँकी सबै यात्रु अनिवार्य ७ दिन होटेल क्वारेन्टिनमा बस्नु पर्छ । यसरी बस्दाको खर्च आफैंले बेहोर्नुपर्छ । यसरी चार्टर उडान भर्दा दिनमा ५ सयजना मात्रै भित्रिन अनुमति दिइनेछ । टर्किस र कतार एयरले एक उडानमा मात्र १ सय जना सम्म बोक्न पाउने गरी अनुमति दिएको पर्यटन मन्त्रालयले जनाएको छ ।
