तितोपाटी – नेपालमा पछिल्लो २४ घण्टामा थप ३८० जनामा कोरोना संक्रमण पुष्टि भएर कुल संक्रमित संख्या २२९७२ पुगेको छ भने देश भरका अस्पताल तथा आइसोलेसन सेन्टरमामा ६५४४ जना उपचाररत रहेका छन् । पछिल्लो २४ घण्टामा ४० जना कोरोना जितेर घर फर्केका छन् भने २ जनाको मृत्यु भएको छ ।
स्वास्थ्य तथा जनसंख्या मन्त्रालयका प्रवक्ता प्रा. डा. जागेश्वर गाैतमको अनुसार आइतबार अपरान्ह सम्म कुल १६३५३ जना कोरोना संक्रमणबाट निको भएर घर फर्किएका छन् । त्यसै गरि मृत्यु हुनेहरूमा कास्कीको पोखरा महानगरपालिका-१९ का ६२ वर्षीय पुरुष र पर्सा वीरगन्ज महानगरपालिका-२ बस्ने २० वर्षीया महिला रहेका छन् भने अहिलेसम्म कोरोनाको कारण मृत्यु हुनेको संख्या ७५ पुगेको छ । हालसम्म देशभर पीसीआर विधिबाट ४ लाख ४३ हजार ८ सय ४ जनाको परीक्षण भएको छ भने हाल क्वारेन्टाइनमा ११ हजार ३८ जना रहेका छन् ।
विश्वव्यापी महामारीको रूपमा संसारभर फैलिरहेको कोरोना भाइरसबाट अहिलेसम्म १ करोड ९८ लाख ४८ हजार भन्दा बढि संक्रमित भइ १ करोड २७ लाख ५० हजार भन्दा बढिले स्वास्थ्यलाभ गरिसकेका छन् भने ७ लाख ३० हजार भन्दा बढिको ज्यान गइसकेको छ ।
