लेख्यौ कि कवि कविता कतै कसैको आडमा ।
चाकडी गरी अगाडि जाने सुषुप्त आशामा ।१।
बाचन कतै गर्यौ कि फेरि तालीको भरमा ।
कविता जन्मे अत्यन्तै राम्रो स्वन्त्र घरमा ।२।
थालनी कतै भएछ क्यारे चाप्लुसी खेतीको ।
कविता पढ्दा त्यसैको बीच सुराक भेटियो ।३।
समाजभित्र घटना घटे समाज लुकायो ।
त्यसैको भर इतिहास नि खुसुक्क लेखियो ।४।
दुनियाँ गर्छन् मुसाको दौड अहम तिखार्न ।
पटक्कै पछि पर्दैनन् हेर अरुको बिगार्न ।५।
नपर लट्ठ तालीको भर गाली नि मिल्नेछ ।
खुलेर लेख मनको कुरा सत्यता बढ्नेछ ।६।
कविको मान वर्षमा हैन कृतिमा गनिन्छ ।
सशक्त लेख कविता कवि छिनमै बनिन्छ ।७।
धिक्कार कवि कसैको तिमी भरौटे बनेछौ ।
त्यसैले होला कसैको आड लागेर भुक्दैछौ ।८।
हरि शर्मा (सुबेदी)
नुवाकोट-गलकोट, बागलुङ नेपाल
हाल: मिसिगन अमेरिका ।
