आफैं आफैं लुछाचुँडी सबै गिद्ध मर्ने भए ।
झम्टिदै ठुङ्दै चिथोरेर ठूलो भुँडी भर्ने भए ।।
कतिबेला देख्न पर्छ यिनको कन्तविजोग
आफुले खन्या भड्खालोमा आफैं पर्ने भए ।।
यहिँ बसि खाउँ भने गिद्धै गिद्ध चारै तिर
सिनो च्यापि उडौं भने जमिन मै झर्ने भए ।।
झाले गिद्ध माले गिद्ध आपसमै नमिलेर
असन्तुष्टि भागबन्डा नाङ्गो नाच गर्ने भए ।।
हेक्का राख चुहिएको डुङ्गा माथि तैरिएको
डुब्न सक्छौ खोला बिच तरि हाल तर्ने भए ।।
बन्द गर झै-झगडा हामीलाई शान्ति देऊ
सार्नु नै छ छिट्टै गुँड सारि हाल सर्ने भए ।।
