छक्क दङ्ग
लोक छन्द: सवाई
**********
सरस्वती हाम्रै घर बास बस्ने राती ।
कविता नि यतै तिर आए देखि जाती । १ ।
शान्ती यहीँ रमाएरै बसेको यो साँझ ।
लक्ष्मी पनि खुशी हुँदा भाग्यशाली आज । २ ।
कालिकाले भन्ने गर्छिन् मद्दत चाहे सम्झ ।
बिहानीले भन्ने गर्छिन् बेला भयो ब्युँझ । ३ ।
शिव अनि बिष्णु लाई हाम्रै घर जाती ।
हरिको त कुरै छोडौँ बासै यहीँ राती । ४ ।
प्रकाश पनि बिद्द्युत सँग मिली-जुली बस्ने ।
प्रतिमा नि रोग सँग, लड्न कम्मर कस्ने । ५ ।
भलो देख्न अरुको नि सबै चाह गर्ने ।
अरु किन पर-पर छक्क दङ्ग पर्ने । ६ ।
हरि शर्मा (सुबेदी)
गलकोट- नुवाकोट, बाग्लुङ, नेपाल
हाल: मिसिगन अमेरिका ।
