गुलाबको फूल चुमौँ
*****************
लोक छन्द- सवाई
***********************
महान जो छ पुरुष त्यहाँ बिचारले ब्यस्त ।
मध्यम मान्छे घटनालाई हावी बनाउँछ ।
अधम भने अरुको नै कुरा काटी हिँड्छ ।
अरुको दोष खोज्नमा नै उसको जीवन बित्छ ।१।
गुलाबको फूल चुमौँ काँडा हेर्ने हैन ।
दोष बिना कुनै चीज यो धर्तिमा छैन ।
कृष्णको नि भएको हो गोठालोको जन्म ।
शिव पनि लगाउँछन मसानको भष्म ।२।
चन्द्रमामा दागै छ नि हेर्नु भाको होला ।
जे जे मिल्यो उही खाने अग्निको नि चोला ।
मैला धैला बगाएर नदी पनि बग्छ ।
कालको छैन भेदभाव सबैलाई लग्छ ।३।
मान्छे मात्रै किन यस्तो आफ्नै भुँडी भर्ने ।
अरुको भाग खोस्न भनी अघि पछि सर्ने ।
बाचौँ बचाउँ गरे पनि राम्रो हुन्थ्यो होला ।
मरी आखिर लानु के छ नश्वर यो चोला ।४।
हरि शर्मा(सुवेदी)
गलकोट- नुवाकोट, बाग्लुङ, नेपाल
हाल: मिसिगन अमेरिका
