तितोपाटी – विश्वव्यापी महामारीको रूपमा विश्वलाइ नै हल्लाइरहेको कोभिड-19 को प्रकोपबाट नेपालमा मंगलबार अपरान्ह सम्म कुल २०९९ जनामा कोरोना संक्रमण पुष्टी भएको छ । मंगलबार थप २८८ जनामा कोरोना संक्रमण पुष्टि भए सँगै नेपालमा २ हजार माथि संक्रमित पुगेको कुरा स्वास्थ्य तथा जनसंख्या मन्त्रालयले पुष्टि गरेको छ। त्यसै गरि अहिले सम्म २६६ जना कोरोना संक्रमणलाइ जितेर घर फर्केका छन् ।
स्वास्थ्य तथा जनसंख्या मन्त्रालयका प्रवक्ता डा. बिकास देवकोटाको अनुसार मंगलबार सम्म नेपालका ६१ जिल्लामा कोभिड-19 फैलिसकेको छ भने पछिल्लो २४ घण्टामा जम्मा ४५ जना मात्रै कोभिड-19 बाट निको भएर घर फर्केका छन् ।
प्रवक्ता डा. विकास देवकोटाका अनुसार अहिलेसम्म पीसीआर विधिबाट ७५ हजार ३ सय ४३ र आरडीटी विधिबाट १लाख १६ हजार ३४५ जनाको नमुना परीक्षण गरिएको छ । पछिल्लो २४ घण्टामा पीसीआर विधिबाट ३ हजार ४ सय ४० र आरडीटी विधिबाट २ हजार ५ सय ८८ जनाको नमुना परीक्षण गरिएको छ ।
विश्वव्यापी महामारीको रूपमा संसारभर फैलिरहेको कोरोना भाइरसबाट अहिलेसम्म ६३ लाख ९४ हजार भन्दा बढि संक्रमित भइ २९ लाख २६ हजार भन्दा बढिले स्वास्थ्यलाभ गरिसकेका छन् भने ३ लाख ७७ हजार भन्दा बढिको ज्यान गइसकेको छ ।
