तोयानाथ उपेक्षित – कुवेत सरकारले कर्फ्यु लगाएको कोरोना कर्फ्युको दोश्रो रात उलंघन गर्ने ९ जना मध्ये ८ जना ईजिप्सियनहरुलाई छिट्टै नै डिर्पोट गरिदै गरेको समाचार स्थानिय मिडियामा आएको छ । कर्फ्यु उलंघन गर्नेहरुलाई कडा सजाय दिने यहाँको सरकारले पहिले नै बताए अनुसार सरकार त्यस्ता प्रबृतीको विरुद्ध कठोर बन्दै गएको देखिन्छ । हिजो राती सरकारले ९ जनालाई समातेको थियो । जसलाई आजै सार्वजनिक पनि गरेको छ । स्थानिय नागरिकको हकमा ठुलो रकमको जरिवाना र जेलको सजाय तोकिएको छ ।
हिजै राती केही ठाउँमा कर्फ्युको अवज्ञा हुने गरी हल्ला गर्ने र चिच्याउने समुहहरुको खोजी भईरहेको बताएको छ । अल्लाह हु अकबर भन्दै बिभिन्न ठाउँमा हल्ला भएको भिडियो सोसियल मिडियामा भाईरल भएको प्रति सरकार त्यसरी भिडियो अपलोड गर्नेलाई साईबर क्राईम अन्तरगत कारबाहि गर्ने भएको छ भने हल्ला गर्ने र चिच्याउनेहरुको खोजी अनुसन्धान भईरहेको जनाईएको छ । हिजो महाबुल्ला एरियामा ७ बजे पछि त्यसरी हल्ला भएको सुनिएको थियो । कर्फ्यु अवधीमा अशान्त माहौल छ भन्ने दर्शाउने खालका सामाग्रि कुनै पनि नेपालीका मोवाईलमा आएमा त्यसलाई शेयर गर्ने जोखिम कसैले पनि नमोल्नु होला ।
यसै बीच कुवेत सरकारले जेल सजाय पुरा हुन लागेका र सामान्य प्रकृतिका घटनामा जेलमा रहेकाहरुलाई बाकी अवधी माफी मिनाह गर्दै भारत र फिलिपिन्स पठाएका ४५० कैदीहरुलाई ति देशहरुले बुझ्न नमानेर कुवेत फिर्ता गरेको समाचारहरु पनि आएका छन । सम्बन्धित देशले हेल्थ सर्टि्पिकेट अर्थात कोरोना भाईरस मुक्त भएको प्रमाण विना पठाएकोले आफ्ना नागरिकलाई समेत लिएनन । त्यसरी फिर्ता आएकाहरुलाई पुन प्रक्रिया पुरा गरी पठाउने सम्बन्धमा कुवेतमा रहेका त्यस देशका दुतावासहरुसँग समन्वय भईरहेको समाचारमा जनाईएको छ । बंगलादेश र श्रीलंकाले पनि भारतीय र फिलिपिन्सकै बाटोमा जाने सन्देश प्रवाह गरेका छन ।
कुवेतको ईतिहासमा कर्फ्यु आज सम्म तिन पटक लागेको छ । सन १९५६ अहमादी स्थित तेलको उत्पादन क्षेत्रमा दुर्घटना हुदा त्ससबाट फैलिएको ग्यासबाट मानिसलाई बचाउन पहिलो पटक कर्फ्यु लगाईएको थियो । यसरी नै सन १९९१ मा भएको गल्फ वारका समयमा दोश्रो पटक कर्फ्यु लगाईएको थियो भने अहिले कोरोनाका कारण मानिसको जीवन रक्षा गर्न र कोरोनाको संक्रमण थप फैलन नदिन मार्च २२ बाट २ साताका लागि कर्फ्यु लगाईएको छ । अहिले लगाईएको कर्फ्यु साँझ ५ बजे शुरु भएर विहान ४ बजे समाप्त हुने गर्दछ । दिनको समयमा भने कुवेतलाई लक डाउन गरिएको छ । दिनको समयमा खाद्य भण्डार र सुपरमार्केट, बेकरी र फार्मेसी भने खुल्ला रहने गरेका छन । समुहमा जम्मा हुन मनाही छ भने भिडभाड हुने सार्वजनिक ठाउँ लाई बन्द गरिएको छ । यहाँका स्कुल कलेजहरु अगष्ट ३ सम्मका लागि बन्द गरिएका छन ।
कर्फ्यु लागु गरिए यता संक्रमणको गति पनि रोकिए जस्तो देखिन्छ । यसबीच एक जनामा अस्तिका दिन र आज दुई जनामा संक्रमण भएको जनाईएको छ । हाल सम्म कुवेतमा संक्रमितको संख्या १९१ जना रहेका छन । उनन्चालिस जनाले स्वास्थ्य लाभ गरिसकेका छन । हाल आईसोलेसनमा उपचार गराउने को संख्या १५२ जना छ । क्वारेन्टाईनमा रहेका ५०७ जना घर फर्किसकेका छन । समाचार अनुसार कोरोना संक्रमित १९१ मध्ये २७ जना विदेशी र अरु सवै कुवेती नागरिक हुन । ती मध्ये अधिकांश विदेशको भ्रमणबाट फर्किएका त्यसमा पनि ठुलो संख्या ईरानबाट फर्कनेको छ ।
कुवेत सरकारले जनस्वास्थ्यको हकमा अधिकतम जिम्मेवार र अधिकतम जागरुक भएर काम गरेको देखिन्छ । यहाँको स्वास्थ्य अवस्था सरकारको नियन्त्रणमा रहेको छ । स्थिती विग्रन नदिन सरकार थप कडाई गर्ने मुडमा देखिन्छ । यसै बिच एक स्थानिय मिडीयाले जनाए अनुसार कोरनाको संक्रमण भए नभएको अवस्था ४५ मिनेटमा नै पत्ता लगाउने डिभाईस पनि गल्फ मै पहिलो पटक कुवेतले भित्र्याई सकेको छ ।
