राष्ट्रिय सभागृहमा आइतबार (१८ फागुन) आयोजित कार्यक्रममा सतारुढ दल नेपाल कम्युनिस्ट पार्टीका अध्यक्ष पुष्पकमल दाहाल ‘प्रचण्ड’माथि जुत्ता प्रहार भयो । प्रचण्डमाथि यसरी प्रहार भएको यो प
हिलो घटना भने होइन । नेपाल संवत ११३३ को अवसरमा तत्कालीन एनेकपा (माओवादी) ले आयोजना गरेको चियापान कार्यक्रममा पदम कुँवर नाम गरेका एक युवाले प्रचण्डमाथि हातपात नै गरेका थिए ।
प्रचण्डले आफूलाई झापड हान्ने युवकलाई माफ गरेको बताएका थिए । तर जिल्ला प्रशासन कार्यालय काठमाडौंले भने २८ हजार धरौटीमा रिहा गरेको थियो ।
सार्वजनिक कार्यक्रममा प्रचण्डमाथि झापड हानिँदा प्रचण्ड नेतृत्वकै पार्टी सत्तामा थियो । बाबुराम भट्टराई प्रधानमन्त्री थिए । यसपटक प्रचण्डमाथि जुत्ता प्रहार हुँदा पनि प्रचण्डको पार्टी सत्तामा छ ।
७ माघ २०६७ मा तत्कालीन एमाले अध्यक्ष झलनाथ खनालमाथि पनि हातपात भएको थियो । सुनसरीमा एमालेकै कार्यकर्ता देवीप्रसाद रेग्मीले खनाललाई झापड हानेका थिए ।
रेग्मी २०४६ देखि एमाले कार्यकर्ता थिए । अचम्मको संयोग नै भन्नुपर्छ, झापड खाएको १५ दिनछि खनाल प्रधानमन्त्रीसमेत बनेका थिए । १३ असोज २०६९ असोज कांग्रेसका तत्कालीन सभापति सुशील कोइरालामाथि आफ्नै कार्यकर्ताले कुर्सी प्रहार गरे । कुर्सीले लागेर कोइरालाको शरीरको बायाँ भागमा सामान्य चोट पनि लागेको थियो । काठमाडौंको कपनमा आयोजित क्षेत्रीय कार्यक्रममा कांग्रेसको विद्यार्थी संगठन नेविसंघका प्रवेश बस्नेतले कोइरालामाथि कुर्सी प्रहार गरेका थिए ।
पहिलो संविधानसभा निर्वाचनमा तत्कालीन एमाले महासचिव माधवकुमार नेपाललाई हराएर चर्चामा आएका माओवादी सभासद् झक्कु सुवेदीमाथि पनि झापड हानिएको थियो । १९ वैशाख २०६८ मा सुवेदीलाई तीनकुनेको एक चिया पसलमा झापड हानिएको थियो ।
कांग्रेसका वरिष्ठ नेता रामचन्द्र पौडेलमाथि पनि २०५१ सालमा संसदमै जुत्ता प्रहार भएको थियो । तत्कालीन एमालेको तर्फबाट राष्ट्रिय सभामा सदस्य रहेका गोल्छे सार्कीले पौडेलमाथि जुत्ता प्रहार गरेका थिए ।
१५ जेठ २०६५ मा नेपाली कांग्रेसका नेता पूर्णबहादुर खड्कामाथि पनि चप्पल प्रहार भएको थियो । खड्कामाथि तत्कालीन एमालेकी सभासद् कमला शर्माले चप्पल प्रहार गरेकी थिइन् ।
३ साउन २०६९ मा भृकुटीमण्डप प्लेनममा तत्कालीन एमाओवादी अध्यक्ष पुष्पकमल दाहाल, प्रधानमन्त्री बाबुराम भट्टराईसहित नेताहरूमाथि असन्तुष्ट लडाकुले कुर्सी प्रहार गरेका थिए । नेपालमा मात्र होइन, विदेशमा पनि नेताहरुमाथि हातपातका घटना हुन्छन् । १४ डिसेम्बर २००८ मा अमेरिकाका राष्ट्रपति जर्ज डब्लु बुश इराक भ्रमणमा थिए ।
भ्रमणका क्रममा इराकमा आयोजित एक पत्रकार सम्मेलनमा एक पत्रकारले बुशमाथि जुत्ता प्रहार गरेका थिए ।सन् २०१२ मा इजिप्ट भ्रमणमा रहेकी तत्कालिन क्रममा अमेरिकी विदेशमन्त्री हिलारी क्लिन्टनमाथि समेत टमाटर र जुत्ता प्रहार भयो । हिलारी चढेको गाडीमा प्रर्दशनकारीहरुले टमाटर र जुत्ता प्रहार गरेका थिए ।
सन् २०१३ मा पाकिस्तानका पूर्व सैनिक शासक परवेज मुर्शरफमाथि बेलायतमा जुत्ता प्रहार भएको थियो । भारतीय कांग्रेसका नेता राहुल गान्धीमाथि २०१६ मा जुत्ता प्रहार गरिएको थियो ।
त्यस्तै दिल्लीका मुख्यमन्त्री तथा आम आदमी पार्टीका नेता अरविन्द केजरीवाल माथिसमेत जुत्ता प्रहार भएको छ । केजरीवालमाथि एक पटक जुत्ता प्रहार भयो भने अर्को पटक उनको शरीरमा कालो मसी नै छ्यापिएको थियो ।
ईरानी राष्ट्रपति हसन रुहानीमाथि अण्डा र जुत्ता प्रहार भयो । संयुक्त राष्ट्रसंघ महासभामा भाग लिएर स्वदेश फर्किने क्रममा उनीमाथि स्थानीय विमानस्थलमा विरोध गर्दै प्रदर्शनकारीहरुले अण्डा र जुत्ता प्रहार गरेका थिए ।
-नयाँपत्रिका दैनिकबाट
