तितोपाटी- अमेरिकाको मानव बेचबिखनसम्बन्धी प्रतिवेदनले नेपालले मानव बेचबिखन तथा ओसारपसार नियन्त्रण गर्न पर्याप्त कदम चाल्न नसकेको ठहर गरेको छ ।
सरकारले मानव बेचबिखन नियन्त्रणका लागि विभिन्न नीतिगत एवं कानुनी प्रावधान तयार गरी कार्यान्वयनमा ल्याएपनि मानव बेचबिखनको समस्या अझ विकराल बन्दैछ । मानव बेचविखन तथा ओसारपसारको मुद्दा विश्वभर चुनौतीको विषय बन्दै गएको छ ।
यसको न्यूनीकरणका लागि सम्पूर्ण विश्व लागिपरे पनि सन्तोषजनक प्रतिफल आउन सकेको छैन । नेपालले पनि मानव बेचबिखनविरुद्ध विभिन्न ऐन, कानुनहरुको तर्जुमा गरेर कार्यान्वयनमा ल्याएको छ भने मानव बेचबिखन तथा ओसारपसार नियन्त्रणसम्बन्धी विभिन्न महासन्धि र अनुबन्धपत्रहरुमा पनि ऐक्यबद्धता जनाएको छ ।
तर पनि मानव बेचबिखनका घटनामा कमी आउनुको सट्टा झन्–झन् बढ्दो छ । नेपाल प्रहरीले मानव बेचबिखनसम्बन्धी घटनाहरुको छानबिनका लागि छुट्टै ब्यूरो खडा गरी केही उपलब्धि हासिल गरे पनि समग्रमा नेपालमा मानव बेचबिखनको स्थिति भयावह नै छ । अमेरिकाले वर्सेनि तयार पार्ने मानव बेचबिखनसम्बन्धी प्रतिवेदन ट्राफिकिङ इन पर्सन्स (टीआइपी) २०१९ काअनुसार नेपालका युवा, अशिक्षित, सिमान्तकृत जाति तथा अल्पसंख्यक जातिहरु बेचबिखनमा पर्ने गरेका छन् । प्रतिवेदनमा तस्करहरुले सामाजिक सञ्जाल तथा प्रविधिको प्रयोगबाट व्यक्तिहरुलाई फसाउने गरेको उल्लेख छ ।
साभार- इमेज खबर
