तितोपाटी- आफूसँग अष्ट्रेलियाको पीआर रहेको भन्दै ठगी गर्ने एक युवतीलाई प्रहरीले पक्राउ गरेको छ । साथै, उनको अपराधमा सघाउने कन्सल्टेन्सी सञ्चालकलाई पनि प्रहरीले पक्राउ गरेको छ ।
महानगरीय अपरधा महाशाखाको टोलीले उनीहरुलाई पक्राउ गरेको हो । पक्राउ पर्नेमा सुनसरीको बुर्ज गाउँपालिका–६ घर भई हाल काठमाडौँको नयाँ बानेश्वरमा बस्ने २३ वर्षीया रेजिना अधिकारी र सिन्धुलीको कमलामाई नगरपालिका–२ का स्थायी ठेगाना भई काठमाडौँको बाँसबारीमा एसियन इन्टरनेशनल कन्सल्टेन्सी चलाउने गणेश भन्ने अरविन स्याङ्बो रहेका छन् ।
अधिकारीलाई सोमबार बानेश्वरबाट र स्याङ्बोलाई मंगलबार बाँसबारीबाट पक्राउ गरिएको महानगरी अपराध महाशाखाका एसएसपी सहकुल थापाले बताए ।
अधिकारीले अष्ट्रेलियाको पीआर रहेको भन्दै काठमाडौंको गोकर्णेश्वर नगरपालिका–४ माकलबारीका अमित श्रेष्ठलाई ठगेकी थिइन् । श्रेष्ठलाई अधिकारीसँग कन्सल्टेन्सीका डाइरेक्टर स्याङ्बोले भेटाएका थिए ।
अधिकारीले रुेष्ठलाई आफूसँग विवाह गरेर अष्ट्रेलिया लैजाने बताएर विहे समेत गरेकी थिइन् । विहेको फोटो र भिडियो समेत तयार पारेर उनले श्रेष्ठबाट ४ लाख ५० हजार रकम लिएर सम्पर्कविहिन भएकी थिइन् । आफू ठगिएको शंका लागेर श्रेष्ठले महाशाखामा उजुरी गरेका थिए ।
पक्राउपछि अधिकारीले यसरी नै अन्य व्यक्तिसँग पनि रकम ठगेको तथ्य फेला परेको प्रहरीले जनाएको छ । अधिकारीले भक्तपुरको चाँगुनारायण नगरपालिका–३ दाहाल गाउँ बस्ने सागर धमलालाई पनि ठगी गरिसकेकी छन् ।
धमलासँग पनि आफू अष्ट्रेलियाको पिआर होल्डर भएको बताउँदै अस्ट्रेलिया लैजाने आश्वासन दिएर उनले १३ लाख ४७ हजार रुपैयाँ ठगी गरेको अनुसन्धानमा खुल्न आएको प्रहरीले जनाएको छ ।
अन्य एक जना युवकसँग पनि यसैगरी विवाह गरेर ठगी गरेको प्रारम्भिक अनुसन्धानमा देखिएको छ । उनले अहिलेसम्म ३ वटा युवकसँग विवाह गरेर ठगी गरेको भेटिएको एसएसपी थापाले जानकारी दिए ।
पक्राउ परेका स्याङ्बोले विभिन्न कागजात बनाइदिने र डकुमेन्टेशनको काम मिलाइदिने भन्दै आफ्नो कन्सल्टेन्सीमा आएका युवकहरुलाई ती युवतीसँग भेटाउने काम गरेको प्रहरीले जनाएको छ ।
