तितोपाटी – कुवेत स्थित चितवन सेवा समाज कुवेतले अागामी फेब्रुअरी २२ तारिक कुवेत ल्याउन लागेको अहिलेकी सबैभन्दा चल्तिकी गायिका मेलिना राईलाई नचिन्ने कमै होलान् । उनले जे शब्द गुनगुनाउँछिन् त्यो हिट भइदिन्छ । दर्शक–श्रोताबाट निकै रुचाइएकी उनी रेडियो नेपालको देशव्यापी गायनमा प्रथम बनिसकेपछि गायनमा लागेकी थिइन् ।
मेलिनाको करियर टर्निङ प्वाइन्ट भइदियो फिल्म दुई रुपैयाँको गीत ‘कुटुमा कुटु…’ । अहिले मेलिनाले जे गाउँछिन् त्यो युट्युबको ट्रेन्डिङमा छाइदिन्छ । मेलिना सफलताको यस्तो घडीमा छिन्, उनी आफैलाई समेत के गर्ने के नगर्ने भइरहेको छ । सबै संगीतकारहरु मेलिनाले आफ्नो गीत गाइदेओस् भन्ने चाहन्छन् ।
करियरको पिकमा रहेकी उनी यो वर्ष धेरैभन्दा धेरै म्युजिक प्रोजेक्टहरु गर्दैछिन् । उनी सफल बन्नुमा उनले गाउने गीतको छनोट पनि एक हो । उनी भन्छिन् ‘पहिले पहिले म जे पनि गाउँथे । अहिले अग्रजहरुको सिफारिसमा मात्रै गाउँछु र गीतको शब्द मेरा लागि मेरो प्रमुख कुरा हो ।’
आएका सबै गीत नगाएर छानेर मात्र गाउने गरेकाले मेलिनाले अहिले हिट माथि हिट गीतहरू थप्दै गएकी छन् । मेलिना भन्छिन्, ‘समाजलाई भड्काउने भल्गर गीतहरु मेरो रोजाईमा पर्दैनन् ।’ मेलिनाले आफ्ना लागि गीतको शब्द मुख्य कुरा रहेको र त्यसैमा ध्यान दिने बताउँछिन् ।
हिटका हिट पाश्र्व गायन दिएकी मेलिना गाउने मात्रै होइन म्युजिक भिडियोमा पनि खेल्ने गरेकी छन् तर फिचरिङ मोडल उनको पेशा नभएर गायन नै मुख्य पेशा मान्छिन् ।
