विश्व फुटबल महासंघ (फिफा)ले आफ्नो संस्था र अध्यक्ष जियानी इन्फान्टिनो विरुद्ध योजनाबद्ध रूपमा भ्रमपूर्ण आरोप लगाएर प्रतिष्ठामाथि आक्रमण भइरहेको दाबी गरेको छ।
हालै सार्वजनिक भएका व्यक्तिगत जीवनसँग सम्बन्धित आरोपहरूलाई इन्फान्टिनोले पूर्ण रूपमा अस्वीकार गरेका छन्। फिफाले पनि ती आरोपहरू आधारहीन र असत्य भएको जनाएको छ।
यता, फिफाको व्यावसायिक अधिकार व्यवस्थापनसम्बन्धी प्रस्ताव विवादमा परेपछि युरोपेली फुटबल महासंघ (यूईएफए) र केही युरोपेली संघहरूले इन्फान्टिनोको नेतृत्वमाथि प्रश्न उठाएका छन्। केही संघहरूले उनको राजीनामासमेत माग गरेका छन्।
तर फिफाले इन्फान्टिनो सदस्य राष्ट्रहरूको लोकतान्त्रिक मतदानबाट निर्वाचित भएको उल्लेख गर्दै आरोप र अफवाहका आधारमा नेतृत्व परिवर्तन गर्न नसकिने स्पष्ट पारेको छ। अफ्रिका, दक्षिण अमेरिका तथा केही अन्य क्षेत्रीय फुटबल संगठनहरूले पनि इन्फान्टिनोलाई समर्थन जनाएका छन्।
