भारतका पूर्वराष्ट्रपति प्रणव मुखर्जीको ८४ वर्षको उमेरमा नयाँ दिल्लीमा सोमवार साँझ निधन भएको छ। उनको छोरा पूर्वसांसद अभिजीत मुखर्जीले सोमवार साँझ उनको निधन भएको ट्वीट गरेर पुष्टि गरेका छन्।
भारतको अर्थ, रक्षा र परराष्ट्र मन्त्रालयको जिम्मेवारी सम्हालेका मुखर्जीको हालै सेनाको आर एन्ड आर अस्पतालमा मस्तिष्कको शल्यक्रिया गरिएको थियो।
अगस्ट १० मा उनले ट्वीट गर्दै आफू कोरोनाभाइरस सङ्क्रमित भएको बताएका थिए। मुखर्जी केही समयदेखि कोमामा थिए।
भारतीय राष्ट्रपति रामनाथ कोबिन्द, प्रधानमन्त्री नरेन्द्र मोदी र गृहमन्त्री अमित शाहले ट्वीट गर्दै समवेदना प्रकट गरेका छन् भने मुखर्जीको निधन पछि भारतमा ७ दिनको राष्ट्रिय शोकको घोषणा गरिएको छ ।
राजनीतिक पद प्रधानमन्त्री बाहेक सबै पद सम्हाली सकेका उनी सन् २०१२ देखि २०१७ सम्म भारतको राष्ट्रपति रहेका थिए। जिवनको केहि काल शिक्षण पेश र पत्रकारिता समेत गरेका उनी राजनीतिज्ञ मात्र नभएर एक अर्थविद पनि थिए ।
