तितोपाटी – नायिका सोनाली बेन्द्रले इन्सटाग्राममा एक पोष्ट गर्दै आफूलाई हाइग्रेड क्यान्सर भएको खुलासा गरेकी छिन् ।
उनको न्यूयोर्कमा उपचार भइरहेको छ । यद्यपि, उनले आफूलाई कस्तो खालको क्यान्सर भएको भने खुलाइनन् ।
मिडिया रिपोर्टका अनुसार उनको क्यान्सर चौथो स्टेजमा रहेको छ ।
पछिल्लो महिना उनलाई हिन्दुजा हेल्थकेयर हस्पिटलमा भर्ना गरिएको थियो ।
सोनालीले सन् २००२ मा फिल्म निर्देशक गोल्डी बहलसँग विवाह गरेकी थिइन् । दुवैको १३ वर्षका छोरा रणवीर रहेका छन् ।
आशावादी छु, डटेर लड्छु
सोनालीले आफ्नो पोष्टमा लेखेकी छिन् – कहिलेकाहीँ जब तपाईंसँग केही आशा हुँदैन तपाईंलाई जीवनले गुगली दिन्छ । हालै एक रिपोर्टमा आयो कि मलाई हाई ग्रेड क्यान्सर छ । हामीलाई अहिलेसम्म यसबारे केही थाहा थिएन । मेरो परिवार र मेरा साथीहरु मेरो नजिक छन् । सबैले मलाई समर्थन गरिरहेका छन् र ख्याल राखिरहेका छन् । म भाग्यमानी छु र सबैलाई धन्यवाद दिन चाहन्छु । योसँग लड्ने योभन्दा अन्य तरिका हुन सक्दैन । म हाल न्यूयोर्कमा उपचार गरिरहेकी छु । म आशावादी छु र बाटोमा आउने सबै अप्ठ्यारासँग डटेर लड्ने छु । अहिलेसम्मको यात्रामा माय र साथले मलाई मद्दत गर्यो । यसका लागि सबैको आभारी छु ।’
डा सन्दीप जसूजाका अनुसार हाइ ग्रेड क्यान्सरमा ट्युमर शरीरमा तीव्र गतिमा फैलिन्छ । यो ट्युमरको आक्रामक स्थिति हो । यो शरीरको कुन अंगमा भयो, बिरामीको उमेर कति हो र कुन स्टेजको हो भन्ने आधारमा उपचार तय गरिन्छ ।
सन् १९७५ को जनवरी १ मा जन्मिएकी सोनाली बेन्द्रलेले मोडलिङबाट आफ्नो करियरको शुरुवात गरेकी थिइन् । सन् १९९४ मा चलचित्र आगबाट उनले बलिउडमा डेब्यु गरेकी थिइन् । भाई (१९९७), सरफरोश (१९९९), जख्म, डुप्लिकेट, हम साथ साथ हे (१९९९), दि ही दिल मे (२०००) लगायत चलचित्रमा उनले काम गरेकी छिन् ।
